• Postos de artesanía, comida, bebidas, bisutería, complementos e xoiaría, entre outras moitas propostas entre as que atopar o agasallo ideal
O mercadiño de nadal de Ponteareas abrirá as súas portas o vindeiro venres día 13 na nave de Aceros del Tea e dinamizará a oferta comercial da vila con postos de artesanía, comida, bebidas, bisutería, complementos e xoiaría, entre outras moitas propostas entre as que atopar o agasallo ideal.
A concellería de Comercio do Concello de Ponteareas informa que o mercadiño de nadal estará aberto en horario de mañá e tarde, de 10:00 a 14:00 horas e de 16:00 a 21:00 horas os sete días da semana ata o vindeiro día 5 de xaneiro (agás o 25 e o día 1).
Ricardo González, concelleiro de Comercio, explica que para facilitar a visita e as compras o mercadiño contará cun espazo para actividades infantís nos que as e o máis cativos poderán estar aprendendo e xogando ao coidado dun/dunha monitora de tempo libre. Deste xeito ao longo de tres horas as nenas e os nenos poderán facer uso deste espazo de lecer mentres os adultos fan as súas compras.
Para encher de vida o espazo Mercatea a concellería de Comercio organiza tres catas de viño gratuítas que terán lugar os días 13, 21 e 28. Antes da cata de viño do día 13 o público poderá desfrutar do concerto de violín e piano con Icíar e Sherguei Maximov. O domingo 15 Emilio Rúa e X. C. Caneiro ofrecerán o recital poético e musical “A lingua somos todos”. Seguindo cos concertos o luns 16 ás 19:30 horas actuará un conxunto de guitarras e o martes 17 ás 20:30 horas o coro de grado profesional interpretará a obra “Para quererte tanto”. O día 19 ás 17:30 horas Cloe Seoane e Ruth Moo ofrecerán un dúo de piano a catro mans e o venres 20 ás 19:30 horas será o turno do concerto do coro Gli Appassionati da man da Deputación de Pontevedra.
Ademais dos concertos Mercatea acollerá varios obradoiros como o de adornos creativos o mércores 18 ás 18:00 horas, o de mel do xoves 19 ás 17:00 horas ou o de maquillaxe o venres 27 ás 17:00 horas tamén.
