O Concello de Mos manifesta a súa máis profunda consternación e dor polo tráxico suceso acontecido nas últimas horas no veciño concello de O Porriño, que tivo como vítima a unha traballadora do sector dos coidados natural de Mos. Un feito que conmociona a toda a comarca e que deixa un fondo sentimento de dor, perplexidade e impotencia.
Como mostra de respecto e solidariedade coa vítima e coas súas persoas achegadas, o Concello de Mos decreta dous días de loito oficial, polo que, ademais do minuto de silencio que compartimos hoxe co Concello do Porriño, as bandeiras ondearán a media hasta nos edificios municipais e suspéndense todos os actos oficiais organizados polo Concello.
Desde o Concello de Mos trasladamos todo o noso apoio e agarimo á familia e persoas achegadas da vítima, poñéndonos á súa disposición para todo aquilo que poidan necesitar nestes momentos tan difíciles.
Así mesmo, o Concello de Mos quere reiterar o seu máis firme compromiso coa protección da vida, coa dignidade das persoas traballadoras dos coidados e coa construción dunha sociedade xusta, segura e libre de calquera tipo de violencia.
