- Inclúe unha escopeta específica para a súa erradicación, insecticidas e EPIs para os operarios que asumen esta tarefa
- A aportación foille realizada ao Concello pola Consellería do Medio Rural en opoio á campaña municipal ‘STOP Velutinas’
O Concello de Mos vén de recibir unha serie de material para a loita contra a Vespa Velutina por parte do Servizo Municipal de Emerxencias que lle foi remitida pola Consellería do Medio Rural da Xunta de Galicia.
O devandito material, cun orzamento total de 5.879,62 euros, inclúe traxes buzo de protección para os operarios de Emerxencias, unha escopeta marcadora para erradicación de vespas velutinas con todos os accesorios e complementos necesarios, unha pértiga extensible e termos para as balas, e os pertinentes aerosoles e insecticidas concentrados. Coa nova arma, Mos suma dúas destas escopetas destinadas específicamente á erradicación da Vespa Velutina.
O novo material foi recepcionado pola concelleira de Medio Ambiente, Laura Méndez, xunto co edil de Emerxencias mosense, Leo Costas.
Estas novas dotacións son froito da colaboración autonómica e empegaranse no marco da campaña medioambiental mosense ‘STOP Velutinas’. Trátase dunha campaña municipal de loita contra esta especie invasora que xa repartiu este ano preto de 400 trampas entre apicultores e colaboradores mosenses.
Ademais das 400 trampas repartidas o pasado febreiro, agora distribuiranse tamén sprays para desactivar os niños, que se atopan na época da súa maior actividade. Estes sprays atópanse incluídos entre o lote de material remitido por Medio Rural e que vén de ser recepcionado no Concello de Mos.
En canto ás trampas, coas repartidas nas dúas campañas previas, Mos suma xa as 1.200 trampas instaladas por todo o termo municipal, 120 en cada unha das 10 parroquias.
Esta trátase dunha campaña anual de prevención contra a Velutina que desde fai anos vénse desenvolvendo por parte da administración local mosense. A idea é ir ano tras ano sumando trampas para facer unha rede e ser máis efectivos no trampeo das raíñas.
Por outra banda o verán é a época de eliminar niños de velutina, e así o fan desde o Servizo Municipal de Emerxencias de Mos, que tamén conta coa colaboración e axuda nesta tarefa dos apicultores mosenses. Neste labor é fundamental o material que vén de recibir o Concello de Mos: a arma de precisión (segunda coa que se conta por parte da administración local mosense), as balas instecticidas para disparar coa mesma, e os equipos de protección para os operarios que realizan estes traballos.
A campaña de loita contra esta especie invasora, repítese cada ano. Os edís de Medio Ambiente, Laura Méndez, e Emerxencias, Leo Costas, declaraban que “na prevención está a clave da loita contra as velutinas” e destacaron para rematar que “desde o Concello de Mos implicámonos fortemente na prevención e eliminación da Vespa Velutina, coñecedores da importancia que teñen campañas deste tipo e da preocupación que esta especie invasora xera non só entre o colectivo dos apicultores, senón entre a veciñanza en xeral”.
