Tras a Comisión de Mobilidade, o concelleiro indicou que os criterios polos que se rexerá a nova ordenanza económica “serán obxectivos”.
A Comisión de Mobilidade, Infraestruturas, Obras e Servizos aprobou esta mañá cos votos a favor dos grupos municipais do BNG e do PSOE, os criterios para a adaptación da ordenanza económica de residuos municipais á lexislación emanada da directiva marco de residuos e á necesidade de avanzar no camiño do pago por xeración. O grupo municipal do PP votou en contra.
O concelleiro de Infraestruturas, César Mosquera explicou que a directriz da nova ordenanza será “quen teña máis capacidade económica pague máis, e nos que teñan menos, paguen menos”. Pendente de baixar aos números concretos, o concelleiro estimou que “a metade dos suxeitos pasivos reducirán o seu recibo e a outra metade subiralles”.
Tamén quixo aclarar a información imprecisa “que anda circulando por aí de que a lei obriga a que a taxa non sexa deficitaria”. A este respecto indicou que aos custes da taxa hai que retirar o custe da limpeza viaria, do denominado “orixe disperso”, os residuos que xeran os edificios e as actividades municipais e as bonificacións.
Partindo desta base, a Comisión traballa “con criterios obxectivos”. Polo tanto, o concelleiro aclarou que no caso das vivendas os criterios serán a superficie catastral máis o consumo de auga, xa que de non coller este último factor quedarían fóra do pago da taxa as vivendas alugadas ao non constar residentes.
En canto á actividade económica, manteríase o criterio da superficie catastral e engadiríase o número de traballadores (a parte correspondente a os residuos domésticos) e o aforo (a parte correspondente aos residuos comerciais).
Ao respecto dos grandes xeradores (os producen máis de 10 toneladas ao ano), teñen a posibilidade de facer a súa propia xestión de residuos como o caso de Zara, Carrefour ou Montecelo, por exemplo, ou ben adherirse ao sistema municipal.
As bonificacións serían as seguintes:
• Compostaxe individual
• Compostaxe comunitaria
• Familia numerosa
• Achegas ao punto limpo
• Recollidas ou achegas especiais adicadas á reutilización
• Doación de alimentos
• Protocolo de tratamento dos residuos e actividades formativas
• Persoas en risco de exclusión social.
A maiores, a nova ordenanza xeraría dúas novas categorías non existentes na actualidade na normativa municipal de Pontevedra (nin en moitas ordenanzas galegas):
• Actividades sen local (concertos, por exemplo)
• Servizos específicos (solicitude dun particular de traslado de grandes cantidades de residuo). Ademais, a Comisión tamén aprobou hoxe a elaboración dun estudo económico da nova ordenanza.
