O BNG de Meaño denuncia que tras a finalización das obras de ampliación do vial A Pedreira-Barreiro-Picón, na parroquia de Xil, un dos veciños que cedeu gratuitamente 167m2 do seu viñedo para o ensanche da estrada aínda non ten reparados os danos causados a consecuencia das obras.
Este proxecto de ampliación implica o retranqueo de viñedos de numerosos propietarios, aos que se lle recolocou a estrutura da viña en tempo e forma, mais resta unha parcela na que as obras están incompletas. O propietario en cuestión presentou por rexistro o 5 de setembro un informe pericial que detalla os danos e prexuízos ocasionados e solicita ao Concello de Meaño a pertinente indemnización.
O viñedo leva desde o mes de marzo sen unha estrutura metálica que soporte as cepas e continúa así a día de hoxe. Cómpre ter en conta que estes meses son os máis delicados para o coidado do viñedo e para a posterior recollida da uva. Durante este tempo o propietario contactou en numerosas ocasións co Goberno Local e manifesta o desinterese e a pouca responsabilidade amosada pola Alcaldía.
O BNG considera que este tipo de obras, nas que a veciñanza cede o seu terreo de xeito desinteresado, deben realizarse no menor tempo posible e non ocasionarlle ningún prexuízo aos veciños e veciñas.
