Os nacionalistas fanse eco da preocupación veciñal polo incremento de tránsito de vehículos nesta zona do rural, provocado polo crecemento do parque empresarial e pola non construción do enlace entre o polígono e Vilalonga
Desde o Bloque recordan que a Xunta de Galicia prometeu esa actuación hai máis de 10 anos con investimentos millonarios, pero que todo quedou en papel mollado, un feito que volve deixar claro “o escaso peso político de Telmo
Martín”, a quen acusa de estar só interesado en aplicar políticas de formigón, sen ter en conta as necesidades da veciñanza, especialmente no rural
O grupo municipal do Bloque Nacionalista Galego de Sanxenxo (BNG) faise eco da preocupación de numerosos veciños e veciñas que residen nas inmediacións do lugar do Santo, pertencente á parroquia de Nantes, sobre a falta de seguridade viaria. Unha situación que, tal e como informaron algún residentes ao grupo da oposición, xa provocou algún accidente. “É necesario tomar medidas antes de que ocorra algunha desgraza”, inciden os nacionalistas, que achacan esta situación ao incremento de tráfico nesta zona como consecuencia do crecemento do polígono empresarial de Nantes e, sobre todo, a que a día de hoxe segue sen acometerse a construción da estrada entre o propio parque industrial e a parroquia de Vilalonga, como alternativa para aliviar o tráfico nas inmediacións.
Desde o Bloque sinalan que “nos últimos tempos tanto no Santo como noutros lugares próximos estase a rexistrar unha densidade de tráfico e de tránsito de vehículos que antes non se producía”. Un feito que preocupa, xa que “as vías secundarias existentes non están preparadas para acoller a tantos automóbiles sen poñer en risco a seguridade dos peóns”. Un exemplo desta situación vívese na vía que vai desde A Vichona ata a estrada provincial que une Nantes con Lores (Meaño), con tramos nos que non existe espazo suficiente para garantir o paso de turismos e o tránsito a pé dos residentes. Isto, ademais, agrávase polo feito de que en ocasións algúns vehículos transitan a velocidades demasiado elevadas, segundo apuntan veciños e veciñas do lugar. O voceiro nacionalista, Fran Leiro, ten claro que esta problemática desaparecería se se construíse dunha vez por todas o enlace entre o polígono e a parroquia de Vilalonga, un proxecto que “a Xunta de Galicia ten esquecido nun caixón desde hai máis dunha década, sen que o Goberno do PP de Sanxenxo nin sequera o solicite”.
O BNG pregúntase cales son as razóns polas que o alcalde, Telmo Martín, non move ficha ao respecto e recorda que o grupo nacionalista presentou en 2024 unha moción plenaria instando á Xunta a que procedese a desbloquear ao proxecto, algo que foi rexeitado polo Partido Popular. “Demóstrase, unha vez máis, que o señor Martín está máis interesado en aplicar cemento en lugares nos que non é preciso, para seguir coa súa política de formigón, que en defender os intereses da veciñanza”, critica o grupo nacionalista. Hai que lembrar que xa hai máis de 10 anos que a Xunta de Galicia do Partido Popular anunciara un investimento de 2,9 millóns de euros para a construción do enlace entre o parque empresarial e Vilalonga, o que suporía unha alternativa para o tráfico que habitualmente circula pola PO-504 e a Autovía do Salnés. “Cada vez hai máis xente que opta por facer uso de estradas secundarias do rural, especialmente no verán, e lugares como O Santo non teñen a capacidade para acoller ese volumen de vehículos, de ahí que xa se teñan producidos algúns accidentes e incidencias que, afortunadamente, de momento non resultaron de extrema gravidade”, apunta Fran Leiro.
O Bloque tamén recorda que, desde o anuncio do proxecto, a Xunta nunca incluíu partidas económicas nos seus Orzamentos anuais para esta actuación. “Telmo Martín presume de bo xestor, pero o certo é que non ten ningún tipo de interese en solucionar os problemas do rural. E semella tamén que o seu peso político fóra do Concello é moi escaso, incluso con administracións nas que goberna o Partido Popular, tal e como demostra a escasez de investimentos por parte da Xunta de Galicia en Sanxenxo”, conclúen os nacionalistas.
