Critican a marxinación da música galega e en galego nun cartel no que de 11 concertos confirmados só figura un grupo vigués, a Coral Casablanca
Xabier P. Igrexas “É indecente que o escenario de Castrelos só teña espazo para o alcalde-teloneiro e os seus rídiculos mitins de autobombo, pero non para a nosa música”
O Bloque Nacionalista Galego (BNG) de Vigo, a través do seu portavoz municipal, Xabier P. Igrexas, criticou a “galegofobia” da programación dos concertos de verán en Castrelos por considerar que marxina a música galega e aos grupos vigueses. Das 11 actuacións confirmadas até o momento, só se inclúe un grupo local, a Coral Casablanca, mentres que a música en galego non ten garantida a súa presenza. Unha situación que o BNG tacha de “desprezo” cara á lingua e á cultura propias nun contexto de gran vitalidade da escena musical galega.
Igrexas sinalou que “é absolutamente inxusto marxinar a nosa música nun escaparate cultural de tanta relevancia como son os grandes concertos de Castrelos”, destacando o agravio que supón para unha cidade como Vigo, “un dos grandes fervedoiros musicais” de Galiza.
O portavoz municipal nacionalista tamén censurou ao Goberno municipal por non apoiar as bandas viguesas, que sofren “o abandono continuado e mesmo o maltrato” por parte do Concello. “É indecente que o escenario de Castrelos só teña espazo para o alcalde-teloneiro e os seus rídiculos mitins de autobombo, pero non para as músicas e músicos de aquí que teñen acreditado un talento de primeirísimo nivel”, lamentou.
O BNG esixe unha rectificación inmediata por parte do Goberno de Abel Caballero para que se garanta unha presenza digna tanto dos grupos musicais vigueses como da música en galego na programación dos concertos de verán. Reclamo que xa trasladaron formalmente na Comisión Informativa de Festas.
A formación nacionalista subliña a necesidade de aproveitar o potencial dunha escena musical que está a ser “un grande motor da normalización da lingua galega” e na proxección cultural de Vigo, fronte a unhas políticas que, segundo denuncian, perpetúan a “galegofobia” e o desprezo polo propio. Aliás, demandan que se poña en valor tamén a música e o canto tradicionais galegos, nun ano, este 2025, onde a celebración das Letras galegas está dedicada ás cantareiras e a poesía de tradición oral.
