Os nacionalistas dan voz ás queixas de varios veciños e veciñas do casco urbán de Sanxenxo, que amosan a súa preocupación polo mal estado do muro que separa o terreo, abandoado e cheo de maleza e suciedade, coas escaleiras que conectan ambas vías
Fran Leiro recorda que en 2019 Telmo Martín anunciou que a reforma de Progreso serviría para recuperar este espazo público, algo que non se fixo realidade e que a día de hoxe “é un exemplo de feísmo que permite o alcalde da política de cemento e formigón de Sanxenxo”
O grupo municipal do Bloque Nacionalista Galego de Sanxenxo denuncia o estado de abandono no que se atopa un espazo que a día de hoxe é claro exemplo de feísmo e abandono en pleno centro urbán da vila. Trátase da parcela situada entre a Rúa Progreso e a Avenida Madrid, situada a carón das escaleiras que unen ambas vías. Unha zona cuxa situación é motivo de preocupación para numerosos residentes, veciños e veciñas da zona,
que se puxeron en contacto co BNG para trasladarlles a súa preocupación e malestar pola falta de acción por parte do Concello para recuperar ou, alo menos, adecentar unha área que leva moitos anos sendo unha escombreira.
O voceiro do Bloque, Fran Leiro, faise eco destas queixas, que non só se centran na maleza e no lixo que se acumula dentro da parcela, e que é perfectamente visible desde a Rúa Progreso. “Outro problema é o estado no que se atopa o peche na parte baixa, na Avenida Madrid”, explica o edil nacionalista. “As fendas son perfectamente visibles, o que
demostra o deterioro do muro. Isto pode supoñer un problema de seguridade para as persoas que transiten por esas escaleiras”, advirte Leiro, que, falando precisamente desa conexión, tamén bota en falta medidas para mellorar a accesibilidade. “O único que se fixo nos últimos anos foi instalar un pasamáns no muro, unha medida totalmente insuficiente para persoas que sufran problemas de mobilidade”, sinala. Pola parcela en cuestión pasa parte do regato Navalón, sendo, de feito, a única parte deste manantial que permanece en descuberto.
Fran Leiro recorda, asemade, que o alcalde, Telmo Martín, asegurou no ano 2019 que a reforma que se acometeu na Rúa Progreso incluiría tamén a recuperación deste espazo. “Falouse de ampliar as escaleiras, limpar a parcelar e dotala de mobiliario urbano. Pero semella que ao final todo era fume, como a maioría das promesas que realiza o señor Martín”, denuncia o edil nacionalista, quen recorda que “non hai que ir tan atrás no tempo para deixar en evidencia esas mentiras, cando vimos de experimentar unha suba de impostos como o IBI, o Imposto
de Vehículos ou as taxas da piscina municipal, cando hai pouco máis dun ano asegurou que baixaría os impostos”. Ante esta situación, e en vista da preocupación suscitada entre varios residentes, o BNG insta ao Concello a que tome medidas. “Non deixa de resultar curioso que o alcalde da política de cemento e formigón, a quen lle encantan as obras faraónicas que despois caen no esquecemento, non sexa quen de acabar con este punto de feísmo nun sitio tan céntrico e tan utilizado pola veciñanza”, conclúe Leiro.
