Os nacionalistas fanse eco das queixas da veciñanza, referidas ao estado de abandono e deterioro dunhas instalacións que tampouco permiten o libre acceso, e recordan que o Bloque incluíu no seu programa electoral de 2019 un proxecto para dar vida a un parque multiaventura nesta zona
Esta infraestrutura súmase á campaña de ‘Bandeiras Negras’ promovida polo grupo da oposición para visibilizar e dar a coñecer as eivas e o abandono de numerosas zonas en todas as parroquias por parte do Goberno local de Telmo Martín
Unha proba máis do abandono ao que ten sometido o Goberno municipal de Telmo Martín ao rural de Sanxenxo é a situación na que se atopan as pistas polideportivas de Bordóns. Este espazo, que conta cun área para xogar ao pádel, leva pechado moito tempo, sen que se acometa ningún tipo de limpeza nin arranxo, un feito que foi denunciado por varias persoas na reunión que o grupo local do BNG mantivo na parroquia, dentro do seu programa de encontros veciñais que levou a cabo entre os meses de abril e xuño. “O que no seu día foi un lugar moi utilizado polos veciños e veciñas de Bordóns e doutras localidades próximas agora é un espazo totalmente infrautilizado pola deixadez do Goberno local”, denuncia o voceiro, Fran Leiro.
Os nacionalistas visitaron onte a pista, na que colocaron unha nova ‘bandeira negra’. Esta campaña impulsada polo Bloque ten coma obxectivo visibilizar e dar a coñecer aqueles lugares esquencidos polo Goberno do Partido Popular, nos que non se actúa, ben sexa a través de melloras, limpeza ou mantemento, a pesar de seren demandas que realiza a propia veciñanza. Neste senso, desde o Bloque propoñen ao Concello de Sanxenxo que sexa ambicioso e leve a cabo unha rehabilitación integral desta zona deportiva. “A súa recuperación debería ir máis alá dun mero arranxo, xa que unhas instalacións novas e en bo estado poderían resultar un revulsivo moi importante para Bordóns”, apuntan desde o grupo da oposición.
A situación de abandono deste espazo prolóngase desde hai varios anos, sen que as peticións veciñais sexan escoitadas polo alcalde, Telmo Martín, quen segue a centrar todo o seu interese en Silgar e no Porto Deportivo. “O rural cada vez está máis abandoado, un feito que se agudiza especialmente no verán”, advirte o voceiro nacionalista, Fran Leiro. Non é a primeira vez que o BNG propón que se recupere esta área para transformala e consolidala como punto de encontro de referencia para xente de todas as idades. En 2019, o Bloque incluíu dentro do seu programa electoral un proxecto para desenvolver na zona pertencente á parroquia de Bordóns un parque multiaventura, unha actuación amable coa contorna, apostando pola utilización de materiais naturais, e que permitise a realización dun gran número de actividades deportivas e medioambientais. Precisamente, dentro dese proxecto incluíase a recuperación destas pistas.
O BNG insta ao Goberno local a que “escoite á veciñanza de todas as parroquias” e actúe con máis celeridade á hora de dar resposta ás súas demandas, xa que “o Partido Popular só actúa cando desde o Bloque denunciamos publicamente as eivas que existen nas parroquias”. O último exemplo é o anuncio realizado polo Concello de mellorar varias pistas en Vilalonga, feito que foi feito público polo BNG hai poucas semanas.
