- O acto terá lugar ás 12.30 horas no salón de plenos do Concello de Bueu
- A iniciativa naceu hai tres e reivindica as mulleres cociñeiras da vila con motivo do Día Internacional das Mulleres
- Doce locais hostaleiros ofrecen ata mañá tapas inspiradas na cociña da homenaxeada
O Concello de Bueu e a Asociación de Empresas Hostaleiras organizan, no marco das III Xornadas Gastronómicas En Feminino Bueu, unha homenaxe oficial a Amelia González, que se celebrará este sábado, 15 de marzo, ás 12.30 horas no salón de plenos da Casa Concello. Ademais, tamén está prevista unha charla- coloquio na que a homenaxeada falará da súa traxectoria ou anécdotas.
Amelia González fundou xunto a José Solla a Casa Solla no 1961. A finais dos anos 80 incorporouse Pepe Solla, un dos seus fillos, que é o que dende o ano 2003 segue o camiño en solitario, co respecto á historia tanto dos seus pais como de Galicia. Precisamente foi Amelia González a que conseguiu co seu home a Estrella Michelín que hoxe o restaurante conserva.
A homenaxe insírese nas III Xornadas gastronómicas en feminino, unha iniciativa na que dende o 8 de marzo ofrece tapas en doce locais hostaleiros da vila e inspiradas na cociña de Amelia González.
A iniciativa naceu hai tres anos co gallo do Día Internacional das Mulleres e busca visibilizar o papel das mulleres cociñeiras, que constitúen máis do 80% das cociñas de restauración, ademais de seguir dinamizando a gastronomía da vila, que é unha das máis potentes da comarca.
Os locais hostaleiros que participan nesta edición son Noite Tapas, cunha empanada aberta de croques, A Centoleira, cun ravioli de centola da ría e caldo de galiña, O Farol, cun pan chino recheo de mexillón da rúa e chourizo de xabaril, La Zarzamora, cun souffle da Sra Amelia, Pyramis, cun wok de alubias salteadas con salchichas criollas e chipiróns, Casa Quintela, con croquetas do Entroido con paté de chourizo galego, Volver, cun biquini de cocido, Ratiño Pequeno, cun pequeno cóctel de benvida, Tiembla Maruxa, cunha bomba de mexillón e algas da ría, A Cepa, con garavanzos con curry e mexillón da ría, Baiuca, con rustrido de raxo de porco galego en salsa de améndoa, e Morriña, cun timbal de pasta.
