- O Centro Social do Mar acollerá ás 20 horas a proxección dun documental sobre o artista e unha mesa redonda
O Concello de Bueu organiza este venres, 19 de xullo, unhas xornadas sobre o artista local José Benito Otero Baena, ‘Pepé’, que terán lugar ás 20 horas no Centro Social do Mar. Ao inicio do acto proxectarase o documental “Otero Baena. O pintor sen pinceis”, que foi elaborado a instancias do Concello de Bueu o pasado ano con motivo da convocatoria da primeira edición do Certame Otero Baena para Artistas Noveis. A continuación haberá unha mesa redonda, na que participarán Carmen García, concelleira de cultura, Beatriz de San Ildefonso, conservadora do Museo de Pontevedra, e os artistas Elena Bangueses e Antón Sobral.
O Concello de Bueu leva varios anos reivindicando a figura de Otero Baena, coa colaboración da familia. Falecido no ano 2017, era coñecido en Bueu a raíz do seu paso pola política e polo traballo na caixa de aforros, e no eido artístico foi considerado como o mellor espatulista da arte galega da época. Chegou a recibir unha bolsa da Deputación de Pontevedra para estudar na Escola de Belas Artes de San Fernando, en Madrid, pero as obrigas laborais levárono a voltar á casa. Otero Baena considerábase un home de formación autodidacta que adoraba pintar paisaxes dunha gran variedade cromática.
Para poñer en valor o seu labor, o Concello descubriu no 2022 unha placa que se colocou na vivenda do autor na rúa Eduardo Vincenti nº9, moi preto da Casa Consistorial. O pasado ano creouse un certame co obxectivo de fomentar a creación artística entre artistas noveis, e tamén como unha forma de seguir reivindicando ao artista.
