• A Administración municipal incorporará a sete traballadores ou traballadoras, con contratos de 30 horas semanais e dez meses de duración
• O alcalde, Jacobo Pérez, lembra que na actualidade o Concello aínda está condicionado polas limitacións da taxa de reposición aprobada polo ministro Montoro e incide en que o obxectivo do Goberno local é poder sacar máis prazas en canto sexa posible
O Concello de Caldas de Reis activou os trámites para reforzar o seu persoal municipal coa incorporación temporal de sete persoas. Esta medida lévase a cabo ao abeiro do Programa +Provincia, impulsado pola Deputación de Pontevedra, e facilitará que a Administración local conte cun maior número de efectivos nas áreas de Obras e de Xesión de Residuos Sólidos Urbanos (RSU). Tal e como explica o alcalde, Jacobo Pérez, os contratos serán de 30 horas semanais, cunha duración de dez meses.
Poderán acceder a estes postos persoas que se atopen inscritas no Servizo Público de Emprego de Galicia.
En concreto, o Concello incorporará un condutor operativo de retroexcavadora, un oficial de 1º de Albanel, un enxeñeiro forestal, dous peóns para obra pública e outros dous peóns para tarefas de limpeza. Pérez Gulín recorda que a día de hoxe Caldas conta con sete traballadores fixos no departamento de Obras e dez para a xestión da recollida do lixo. “Desde o primeiro momento marcámonos o obxectivo de tratar de acadar un volumen de persoal acorde coas necesidades do Concello, pero a día de hoxe aínda estamos moi condicionados polas limitacións da taxa de reposición que aprobou o ministro Montoro durante o Goberno do Partido Popular”, explicou. Unha das metas neste mandato é conseguir reforzar estas áreas, pero “mentres non sexa posible facelo, buscamos outras fórmulas para garantir que todos os veciños e veciñas de Caldas de Reis conten con estes servizos tan importantes”, engadiu o alcalde. Ademais das contratacións temporais a través do Programa +Provincia, o Goberno local tamén impulsou a contratación externa de servizos como a limpeza e mantemento de vías e cunetas no rural. “Desde que se aplicou a taxa de reposición, Caldas foi medrando, polo que temos que adaptarnos ás necesidades dentro da marxe de manobra que ten a Administración local”, recalcou Jacobo Pérez, que tamén destacou o esforzo que está a facer o persoal á hora de acometer os traballos de limpeza, mantemento e reparacións tanto no rural como no núcleo. Precisamente, estes días os operarios están a centrar os esforzos na limpeza de varias rúas do casco urbano, o que fai necesario prohibicións limitadas no tempo de estacionamiento, mentres que no rural estase a proceder ao desbroce e posta a punto de viais nas parroquias de Godos e Saiar.
Con respecto ao proceso de contratación, o Concello recorda que para a selección de candidatos teranse en conta varios factores. Deste xeito, haberá preferencia para persoas que se atopan en situación de desemprego de longa duración, así como para mulleres e mozos e mozas con baixa cualificación. Tamén terán máis posibilidades de acceso a estes contratos temporais persoas maiores de 45 anos ou aquelas que poidan acreditar unha discapacidade física de máis do 65% ou con máis dificultades para acceder ao mercado laboral. As vítimas de violencia de xénero, as familias monoparientais e as persoas con nieveis de renda máis baixa tamén terán prioridade no proceso selectivo.
