Durante toda esta semana unha ducia de crianzas participaron no obradoiro ‘Cada día un artista’ que se desenvolveu de 10:00 a 12:00 horas en Praia América a cargo de Laine Villero. Cada xornada estivo adicada á interpretación dun pintor
O alcalde de Nigrán e o edil de Cultura, Juan González e Roberto Garrido, asistiron este mediodía á clausura do obradoiro de pintura en Praia América-Lourido ‘Cada día un artista’, do Concello de Nigrán e a cargo de Laine Villero. Así, unha ducia de crianzas de 6 a 14 anos adicaron cada xornada desta semana a interpretar as obras dalgúns dos pintores máis ilustres, como por exemplo Vincent van Gogh, Edvard Munch, Maruja Mallo, Pablo Picasso ou Frida Khalo. A rapazada, que pintou con acrílicos de luns a venres de 10:00 a 12:00 horas baixo a sombra das árbores e aos pés de Praia América, expuxo este mediodía todas as súas creacións para que as familias puidesen admirar o resultado final. A este obradoiro artístico o Concello suma o de cómic manga celebrado en xullo tamén con gran éxito. O obxectivo, ao igual que cos diferentes campus deportivos que se ofertan conxuntamente desde o Concello e os clubes de Nigrán, é ofrecer un tempo de lecer de calidade ás crianzas mentres que se facilita a conciliación familiar.
