Todos a unha en Ponteareas, no seu obxectivo de convidar á cidadanía a construír unha vila máis fermosa e saudable o Concello de Ponteareas abre o prazo para inscribirse na segunda edición do concurso “Balcóns Floridos” que potenciará a arte efémera floral aos balcóns.
Realzar os beneficios ambientais dos balcóns como elementos vivos e implicar aos veciños da localidade no coidado e ornamentación dos balcóns e fiestras de edificios e casas é a finalidade deste concurso no que calquera pode participar inscribíndose dende o 1 de xuño ata o 13 de xuño de 2025. A valoración dos balcóns participantes desenvolverase na semana previa á festividade do Corpus, entre os días 16 e 19 xuño.
Con esta iniciativa o Concello promove a participación e a implicación da cidadanía, ao tempo que fortalece o seu vínculo coa contorna urbana. “A recuperación dos balcóns non só suporá unha mellora para os propietarios ou arrendatarios, senón tamén para o concello, pois incrementará o seu atractivo tanto para os cidadáns como para os visitantes. Ademais facemos que sexan parte activa en atenuar os efectos do cambio climático aumentando a vexetación e conseguindo unha maior captura do CO2, unha redución da contaminación e
unha mellora da calidade de vida”, explica a concelleira de Medio Ambiente, Silvia Fdez Táboas.
A alcaldesa de Ponteareas, Nava Castro, adianta que seguirá apostando por proxectos como este. “O papel da vexetación, das flores, é clave neste municipio e debe ser impulsado e potenciado como argumento cultural, social e turístico”.
Ponteareas é un dos municipios que participan no movemento Vilas en Flor Galicia, que ten como obxecto a mellora ambiental, estética, social e de sustentabilidade das súas contornas municipais.
O Concello de Ponteareas conta para o desenvolvemento do concurso coa colaboración da Fundación Juana de Vega que ten por obxecto promover o coñecemento, conservación e desenvolvemento do medio rural e a paisaxe de Galicia a diferentes escalas, con especial dedicación á formación da súa poboación activa, á preservación do patrimonio natural ecultural, da súa contorna natural e humana e á mellora da da súa base económica e das actividades con ela relacionadas, entre outras.
Para poder participar tan só haberá que ter unha xanela ou balcón aberto á rúa e cumprimentar unha solicitude a través de instancia xenérica no rexistro do Concello de Ponteareas, de 09:00 a 14:00 horas, de luns a venres (excepto sábados, domingos e festivos). Tamén poderá presentarse a solicitude a través da sede electrónica municipal https://ponteareas.sedelectronica.gal/info.0
O xurado do presente concurso estará composto por dous (2) membros do movemento Vilas en Flor Galicia que coordina a Fundación Juana de Vega, o director da Escola Galega do Paisaxe Juana de Vega, un profesor da USC en materia de paisaxe, a Alcaldesa do Concello de Ponteareas, a Concelleira con competencia en materia de Medio Ambiente, e un técnico da área de Medio Ambiente do Concello de Ponteareas. Os membros do xurado non poderán participar no concurso. O Xurado fará público o resultado do concurso a partir do 20 de xuño de 2025.
Entre os criterios de valoración que establecen as bases están a orixinalidade, o deseño e composición florística, as achegas ambientais, a sustentabilidade, o cromatismo e a durabilidade.
