Os martes 19 e 26 deste mes desenvolverase unha formación para axentes locais
O Concello de Tui avanza, con paso firme, na constitución da Mesa Local de Coordinación Interinstitucional contra a Violencia de Xénero. Esta é unha iniciativa clave para fortalecer a colaboración entre axentes locais na loita contra a violencia de xénero.
Con este obxectivo nas próximas dúas semanas desenvolverase un programa formativo no que participarán os diferentes axentes que interveñen na loita contra a violencia machista e na promoción da igualdade na nosa contorna para fomentar a colaboración entre eles. Así na formación prevista están convidados a participar a alcaldía, xunto ás concelleiras e concelleiros e persoal técnica dos departamentos de Igualdade, Servizos Sociais, Persoal, Deporte, Ensino, Comunicación, así como representantes da Policía Local, Garda Civil, Centro de Saúde, CIM’s da Guarda, O Porriño e Gondomar. Tamén foron convidadas as direccións e os departamentos de orientación dos centros educativos tudenses.
Mesa Local de Coordinación Interinstitucional contra a Violencia de Xénero será un foro destinado a promover o traballo conxunto e á creación de políticas efectivas en prol da igualdade e contra a violencia machista.
Persoal técnico especializado na formación das Mesas Locais de Coordinación Interinstitucional Contra a Violencia de Xénero, promovidas pola Dirección Xeral de loita contra a violencia de xénero, será o encargado de impartir esta formación que busca capacitar ás persoas participantes nas habilidades necesarias para a organización e dinamización das Mesas Locais. Deste xeito perséguese garantir un funcionamento eficiente e unha toma de decisións efectiva. As sesións están dirixidas a mellorar a coordinación entre os axentes implicados, identificar e superar obstáculos comúns e establecer alianzas estratéxicas na prevención da violencia de xénero.
A formación celebrarase os martes 19 e 26 de novembro, cun total de 8 horas lectivas, abordando aspectos fundamentais para o traballo da Mesa Local. Así por unha banda incidirase na optimización da eficiencia en asembleas e reunións para unha toma de decisións áxil e inclusiva. Por outra parte traballarase na identificación de barreiras e lóxicas de traballo que inflúen no funcionamento da Mesa Local. Tamén se abordarán as estratexias para fomentar a participación activa de todas as persoas implicadas, crearanse alianzas con axentes e entidades locais para desenvolver políticas de prevención, e desenvolveranse competencias de liderado democrático e transformador, incluíndo habilidades en comunicación, mediación, resolución de conflitos, entre outras.
