O museo Meirande acolle un coloquio sobre o bote “Manuel” e a cultura mariñeira

O museo de interpretación da Batalla de Rande, o Meirande, acolle este sábado un interesante coloquio ao redor do histórico bote “Manuel” e a revista Nova Ardentía. A cita é ás 19.00 horas e participarán a alcaldesa de Redondela, Digna Rivas, o propietario do bote Faustino Otero, a asociación Lagoa dos Bébedos e a Federación Galega da Cultura Marítima con Manuel Lara, Emilio Ínsua e Antón Mascato.
O bote “Manuel”, que desde hai un mes preside a entrada do museo, ten case un século de antigüidade e abastecía de víveres e roupa á illa de San Simón cando foi prisión e logo como orfanato. Tamén tería un papel relevante durante a II Guerra Mundial salvando a refuxiados xudeus que chegaban á ría de Vigo. Coa súa restauración por parte do Obradoiro de Emprego do Concello “poñemos en valor este importante elemento do noso patrimonio, que agora pode verse no museo como un símbolo da nosa historia”, explica Rivas. O coloquio xirará tamén ao redor do último número da revista Nova Ardentía “Oficios de escuma”, na que se abordan temas como a carpintería de ribeira, as traiñeiras, os bergantíns negreiros e a fala mariñeira, entre outros moitos temas da cultura mariñeira e fluvial.