• Martínez e Rey critican a “degradación” das pistas polideportivas ao aire libre con “botellas de todos os tamaños, papeis de todo tipo e un cúmulo de lixo sen recoller durante meses que dá vergoña allea”
• O Partido Popular esixe “aumentar o número de prazas de aparcamento porque son insuficientes co tráfico que se xera durante o curso escolar”
O Partido Popular de Pontevedra visitou o núcleo urbano de Pontemuíños para denunciar a “nula xestión do Goberno local cun barrio que se degrada cada día máis #ante a inoperancia” do alcalde #Miguel Anxo Fernández Lores.
Os edís populares Martín Martínez e Beatriz Rey fixéronse eco do malestar da veciñanza que leva anos reivindicando a mellora das zonas públicas da contorna do complexo deportivo Rías do Sur. “O Concello ten a obrigación de aumentar o número de prazas de aparcamento porque son claramente insuficientes co tráfico que se xera durante o curso escolar”, solicitaron.
Esta petición dos residentes da zona foi ignorada, sistematicamente, polos responsables municipais de mellorar un barrio que está “sucio e “abandonado”. O exemplo máis evidente da súa “degradación” son as pistas polideportivas ao aire libre, onde hai “botellas de todos os tamaños, papeis sucios de todo tipo e un cúmulo de lixo sen recoller durante meses que dá vergoña allea”.
“Os contedores de lixo están desbordados, do mesmo xeito que no resto da cidade, e a falta de roza provoca situacións tan surrealistas como non poder observar a ría de Pontevedra desde os bancos do miradoiro”, engadiu Martínez.
“Desde Pontemuíños, recomendamos ao alcalde que se dea unha volta por esta zona abandonada do arrabalde e poña os medios dos que dispón ao servizo duns veciños que pagan os seus impostos do mesmo xeito que os do centro histórico”, concluíu.
