A alcaldesa entregoulles unha placa de agradecemento aos voluntarios de Protección Civil que se desprazaron ata a zona afectada pola DANA e ao dono dun taller que doou o material necesario para a reparación dos pneumáticos danados polo barro
A solidariedade non entende de distancias e, para mostra, o exemplo dado por Rafael, Roberto e Pascual, que demostraron que arrimar o ombro é o único camiño tras unha catástrofe como a causada pola DANA o pasado mes de outubro en Valencia. A alcaldesa, Ánxela Fernández Callís, entregou este mércores unha placa de agradecemento a estes tres veciños do Rosal pola súa contribución, esforzo e compromiso coa recuperación da zona afectada.
Rafael Gil e Roberto Gómez foron os dous voluntarios de Protección Civil do Rosal que se desprazaron ata Valencia para ofrecer os seus servizos en plena emerxencia. Partiron cara a Valencia coa pick up cargada de torres de iluminación, bombas de achique de gran caudal e material de limpeza para achegar o seu gran de area nun escenario cheo de barro e escombros. Pola súa banda, Pascual Gil, dono de MGV Automoción, xogou un papel igualmente importante ao proporcionar todo o material necesario para reparar os pneumáticos de vehículos, xa que entre os estragos provocados pola DANA hai unha avalancha de pinchazos de rodas. Recolleu o recoñecemento no seu nome a súa irmá, Loli Gil.
“Este tipo de actos son os que realmente definen a forza da nosa comunidade. Rafa, Roberto e Pascual amosaron dende o primeiro momento a súa disposición a axudar e colaborar dalgún xeito con Valencia e dende o Concello só podemos estar infinitamente agradecidos. Esta placa que hoxe lle entregamos é unha pequena mostra do noso recoñecemento a súa xenerosidade”, louvou a rexedora.
