Arranca en Fornelos este novo servizo que facilitará a recollida de residuos especiais de forma cómoda e segura. Cada 15 días visitará un novo espazo
O Rosal volve poñerse á vangarda da sostibilidade coa posta en marcha do Punto Limpo Móbil (PLM), un servizo pioneiro que permitirá á veciñanza desfacerse de residuos especiais de pequenas dimensións de forma segura, responsable, cómoda e sen desprazamento. O servizo, que arranca esta semana en Fornelos, moverase cada 15 días e percorrerá ata doce puntos estratéxicos do municipio, evitando que estes materiais rematen en colectores convencionais e garantindo o seu tratamento axeitado.
A alcaldesa, Ánxela Fernández Callís, salienta que “seguimos avanzando cara a un Rosal máis sostible. Este servizo achega a reciclaxe a barrios e parroquias e facilita que toda a veciñanza poida contribuír á protección do medio ambiente evitando desprazamentos innecesarios”.
A rexedora subliña a importancia deste proxecto, “xa que dende o Concello queremos que reciclar sexa doado para todas e todos, eliminando barreiras e ofrecendo alternativas que permitan un tratamento responsable dos residuos”.
O punto limpo móbil recollerá aceites usados, baterías, cartuchos de impresora, pequenos electrodomésticos, lámpadas LED e tubos fluorescentes, cables e cargadores, envases con restos de pintura, residuos téxtiles, teléfonos móbiles e xoguetes de plástico, entre outros.
O servizo conta cun itinerario fixo de 12 puntos de recollida: Fornelos, Martín, Novás, San Xian, Marzán, A Cunchada, Pías, San Miguel, Tabagón, As Eiras, O Calvario e Portecelo. O calendario de paradas pode consultarse na web de Medio Ambiente do Rosal (medioambiente.orosal.gal) ou chamando ao 986 625 000.
Con esta iniciativa, o Concello do Rosal reafirma o seu compromiso cun modelo de xestión sostible e de proximidade, buscando mellorar a calidade de vida da veciñanza, implicando a rosaleiros e rosaleiras na protección do medio ambiente e na construción dun futuro máis verde para todos.
