As películas proxectaranse os días 5, 6, 12 e 13 de febreiro e abordarán as seguintes temáticas: dó, menores en risco, reinserción social e suicidio
A Concellería de Benestar Social va da man de Taller Aberto e Suso Novas nunha iniciativa que busca acompañar as persoas con problemas de saúde mental e as do redor e reivindicar a sanidade pública
O cinema é emoción, acción, fantasía e realidade. Axúdanos a interpretar, a coñecer e recoñecer o noso mundo e a imaxinar outros, apréndenos a entendernos e a aceptar ao diferente. E axúdanos a procesar emocións difíciles e situacións que axitan as nosas vidas e conciencias. Neste marco a Concellería de Benestar Social promove o ciclo Cinema e saúde mental: O oficio de vivir, unha iniciativa do colectivo Taller Abierto e o director do Festival Novos Cinemas, Suso Novás.
“O oficio de vivir combina diferentes disciplinas, é un ciclo moi pensado, moi ben asesorado por profesionais da saúde mental que busca contribuír, axudar, acompañar a aquelas persoas que están pasando por problemas vinculados coa saúde mental e a xente de redor” subliñou a concelleira de Benestar Social, Anabel Gulías na presentación de Cinema e Saúde Mental. Ao seu carón, a co-organizadora Ana Barreiro, de Taller Abierto, quen avogou pola necesidade de “facer fronte á vida con benestar emocional”
Cinema e saúde Mental chega á súa terceira edición, abordando catro temáticas (unha por película seleccionada): dó, menores en risco, reinserción social e suicidio. Cada sesión seguirá o mesmo esquema: presentación e contextualización do filme, proxección, charla de Suso Novás co experto/ a invitada e coloquio.
Gulías cualificou ao cinema “como unha ferramenta moi poderosa que nos axuda a poñernos no lugar dos demais con empatía, a recoñecer situacións polas que pasamos nós mesmas ou persoas próximas”. E nesta viaxe destacou a importancia dos coloquios que seguirán ás proxeccións, guiados por especialistas que nos van axudar a interpretar, a re-imaxinar, a re-situar os problemas, as realidades que imos ver na pantalla do Teatro Principal”.
“O oficio de vivir pretende ser tamén unha reivindicación da necesidade de reforzar os medios públicos e as profesionais da saúde mental” rematou a concelleira de Benestar Social, após de recordar que “aínda vivimos nunha sociedade na que dependes da túa capacidade adquisitiva para poder os problemas de trastorno mental”.
Nesta liña, Ana Barreiro lembrou que o Plan Galego de Saúde Mental (que rematou no 2004) sinala que “o 21% da poboación de Galicia presenta algún tipo de trastorno mental”. “As cifras falan por si soas” engadiu, polo que agarda que O oficio de vivir se consolide na programación cultural do Concello de Pontevedra.
Programa
As sesións do Ciclo Cinema e saúde mental, dirixidas a un público xeral, desenvolveranse os días 5 , 6, 12 e 13 de febreiro, ás 19.00 horas, no Teatro Principal. O acceso é libre ata completar aforo.
| Data | Película | Temática | Relator/a |
| 5-Feb | Non sei dicir adeus (No sé decir adiós, España, 2017, Lino Escalera) | Dó | Alejanda Santos Polo/ Suso Novás |
| 6-Feb | Temos que falar de Kevin (We Need to Talk About Kevin, Inglaterra, 2011, Lynne Ramsay) | Menores en situación de risco | Rocío Gómez Juncal/ Suso Novás |
| 12-Feb | Eu tiña unha vida (Yo tenía una vida, España, 2023, Octavio Guerra) | Reinserción social | Pablo Braña/Suso Novás |
| 13-Feb | Xente corrente (Ordinary People, Estados Unidos, 1981, Robert Redford) | Suicidio | Estrela Gómez/Suso Novás |
Relatoras:
Alejandra Santos. Licenciada en Psicoloxía pola Universidade de Salamanca. É especialista en Psico-oncoloxía e coidados paliativos. Actualmente traballa na Asociación Española Contra o Cancro en Pontevedra. A práctica neste ámbito obrigouna a ter formación e especialización en duelo para acompañar ás familias tras a perda dun ser querido.
Rocío Gómez. Licenciada en Psicoloxía pola Universidade de Santiago de Compostela e doutora en Psicoloxía pola Universidade de Vigo, sendo docente e investigadora desde 2003 en diferentes universidades españolas. Foi profesora na Universidade de Vigo, Santiago e na UNED e desde 2018 é profesora na UNIR. Desde novembro de 2024 é Subdirectora académica da Área de Psicología da Facultade de Saúde de UNIR.
Pablo Braña. Graduado en Traballo social. Entre o 2008 e o 2023 traballou adscrito aos Servizos de Hospitalización a Domicilio e Oncoloxía do Complexo Hospitalario Universitario de Vigo (CHUVI). Participou como relator en distintos congresos e talleres. Na actualidade traballa no Servizo de Psiquiatría (Unidade de Agudos) do Hospital Álvaro Cunqueiro de Vigo. Estrela Gómez. Licenciada en Psicoloxía pola Universidade de Santiago de Compostela. Desde 2003 leva traballando como psicóloga en diferentes centros de menores e de rehabilitación psicosocial así como na súa propia consulta en Pontevedra. Desde 2007 é a psicóloga e coordinadora dun centro de Rehabilitación Psicosocial en Cangas para personas con trastorno mental grave.
