- O Multiúsos de Arcade acolle, este sábado 21 de febreiro, a cuarta edición do Obradoiro de Montaxe, organizado de maneira conxunta pola Sociedade de Pesca de Soutomaior e o Concello.
Soutomaior volverá acoller este ano o Obradoiro de Montaxe de Artesáns da Pesca, organizado de maneira conxunta pola Sociedade de Pesca de Soutomaior e o Concello. Unha cita que esta mañá presentaron o alcalde, Manu Lourenzo e o presidente da Sociedade de Pesca de Soutomaior, Isaac Guzmán.
A cita será xa a cuarta deste obradoiro e vaise celebrar este sábado 21 de febreiro no Multiúsos de Arcade. Un evento que reunirá os mellores artesáns do sector da pesca a nivel galego, estatal e internacional.
Así, deste xeito, está confirmada a asistencia de Roberto Caldeiro, Jaime Omar, Antonio Vilariño, Miguel Ángel Montoto, Santi Nitas, Alex Puente, José Luís Maceira “Maki”, Eloi Saavedra, Jorge Rodríguez Maderal, Jorge Blackfish Lures.
O alcalde de Soutomaior, Manu Lourenzo, destacou a importancia deste obradoiro de montaxe e de todo o traballo realizado pola Sociedade de Pesca de Soutomaior, “poñendo en valor o potencial dos nosos dous ríos, Verdugo e Oitavén, e das persoas que dedican as súas vidas a eles”.
Así, presentou a actividade destacando como “unha inmensa sorte” que Soutomaior acolla este tipo de actividades de divulgación sobre un dos sectores con maior conciencia medioambiental e que máis coidan dos recursos naturais do concello.
O obradoiro abrirá ao público e terá entrada de balde en horario de mañá de 9:30 a 13:30h., e, de tarde, de 16:00 a 19:00h.
Durante a quenda da mañá, os artesáns irán facendo demostracións prácticas sobre o seu labor e haberá un curso básico de lance de mosca antes do peche ao público.
