● Uxía Rodríguez, Adriana Mouriño e Cloe González foron as gañadoras das tres categorías coas súas postais
O Concello do Porriño entregou hoxe os premios do Concurso de Postais de Nadal, un certame que recoñece a creatividade da cativada nestas datas tan sinaladas. Na súa terceira edición, o concurso contou coa participación de 42 nenos e nenas de 3 a 14 anos que, coas súas imaxes e mensaxes, souberon plasmar a esencia do Nadal e a identidade do seu concello.
O acto, que tivo lugar na sala de comunicación da Casa Consistorial, estivo presidido polo alcalde, Alejandro Lorenzo, quen destacou a importancia deste tipo de iniciativas para fomentar a participación dos nenos e nenas na vida do Concello. “O Nadal é un tempo de compartir, e este concurso amosa o cariño e a ilusión que as nosas nenas e nenos poñen na súa arte. As postais presentadas reflicten non só a maxia das festas, senón tamén o orgullo de vivir no Porriño”, afirmou Lorenzo.
Pola súa parte, Carolina González, concelleira de Normalización Lingüística e Educación, quixo agradecer a todas as persoas participantes e tamén resaltar a implicación das familias no proceso. “Este concurso é tamén unha forma de afianzar a nosa cultura e tradiciós. Ver como os cativos e cativas se apropian dos símbolos locais para expresar o seu desexo de felicidades no Nadal é un verdadeiro pracer. Neste contexto, celebramos a diversidade de propostas que recibimos este ano”, subliñou González.
Entre as postais gañadoras, as propostas máis innovadoras e significativas reflicten a identidade do municipio, desde o debuxo da Casa Consistorial de Adriana Mouriño ata a entrañable postal de Cloe González Lago, que combinou arte e poesía ao retratar a figura de Papá Noel. Cada unha das postais premiadas transmite tamén o desexo común de benestar e felicidade, nunha celebración que foi máis aló da arte: un acto de orgullo porriñés.
Os premios, que consisten en lotes de material escolar, foron entregados ás/aos gañadoras/es nas tres categorías: de 3 a 6 anos, de 7 a 11 anos e de 12 a 14 anos.
CATEGORÍA 1: DE 3 A 6 ANOS
● 1º premio á/ao nena/o: Uxía Rodríguez Mouriño (5 anos)
● 2º premio, premio á/ao nena/o: Lía Barreiro Piñeiro (3 anos)
● 3º premio, premio á/ao nena/o: Uxía Pérez Alonso (5 anos)
CATEGORÍA 2: DE 7 A 11 ANOS
● 1º premio á/ao nena/o: Adriana Mouriño Domínguez (9 anos)
● 2ºpremio, premio á/ao nena/o: Thelma Táboas Fernández (7 anos)
● 3º premio, premio á/ao nena/o: Cloe Ferreirós Rodríguez (10 anos)
CATEGORÍA 3: DE 12 A 14 ANOS
● 1º premio á/ao moza/o: Cloe González Lago (13 anos)
● 2º premio, premio á/ao moza/o: Martín Soto Pérez (13 anos)
● 3º premio, premio á/ao moza/o: Sara Estévez Dauzón (12 anos)
