O sábado, 16 de novembro, os voluntarios estarán na praza da Peregrina en horario de 11 a 14 horas e de 17 a 20 horas.
O domingo 17 trasladaranse a Monte Porreiro. As saídas continuarán o sábado 23 no campo de fútbol Manolo Barreiro e o domingo 24 na praza da estación de autobuses.
A agrupación dispón de 27 persoas afiliadas que dispoñen de formación impartida pola Academia Galega de Seguridade e homologada pola Xunta de Galicia.
A Agrupación de Protección Civil de Pontevedra inicia esta fin de semana unha campaña de captación de voluntariado co obxectivo de ampliar a súa base de afiliados e afiliadas que na actualidade é de 27 persoas.
A primeira xornada será este sábado, 16 de novembro. En horario de 11 a 14 horas e de 17 a 20 horas os voluntarios e voluntarias de Protección civil estarán na praza da Peregrina ofrecendo información á veciñanza sobre os labores que fan desinteresadamente á sociedade así como a formación que reciben. Instalarán unha carpa, entregarán folletos nos que se resume a súa actividade e resolverán as dúbidas de todos os que se acheguen até a Peregrina.
O domingo 17 a carpa de Protección Civil trasladarase á praza de Europa do barrio de Monte Porreiro no mesmo horario que o sábado.
A campaña continuará o vindeiro fin de semana. O sábado 23 de novembro estarán na Xunqueira, na entrada ao Campo de fútbol Manuel Barreiro, e o domingo, 24 de novembro, estarán na praza da estación de autobuses. Ámbolos dous días estarán nos mesmos horarios que este sábado: de 11 a 14 horas e de 17 a 20 horas.
Adelaide Lopes, presidenta de Protección Civil Pontevedra -a primeira muller que dirixe o corpo- xa adiantou que en Pontevedra o voluntariado está protexido pola Academia Galega de Seguridade. Está na rúa, pero cunha formación específica e está preparado para facelo.
Funcións e formación
Protección Civil Pontevedra é un corpo moi importante na colaboración cos equipos de seguridade e emerxencias da cidade. O seu labor é practicamente diario e ten múltiples funcións como a vixilancia do Camiño Portugués, asistencia a Bombeiros, busca de persoas desaparecidas, apoio á Policía, apoio en traballos forestais, control de eventos, avaliación de zonas, xestión en inundacións, atención e resposta en emerxencias…
Ademais, ofrece formación de balde en disciplinas como os primeiros auxilios, uso de maquinaria ou comunicacións. Tamén se beneficia de cursos da Axencia Galega de Seguridade que están homologados pola Xunta de Galicia como pode ser o caso de condución de vehículos todoterreo, licenza de navegación, apoio na xestión de accidentes en estrada, prevención e loita contra os incendios urbanos e forestais…
Tamén dispón un importante número de recursos propios para desenvolver os seus traballos como lanchas, vehículos… e instalacións propias en Pasarón.
