– A alcaldesa, Digna Rivas, fixo fincapé en que as Festas da Coca son máis que unha celebración “porque son a herdanza que recibimos das xeracións que nos precederon e a responsabilidade de mantelas vivas para as que virán”.
– O acto acolleu o emotivo relevo das Penlas, a despedida de tres históricos danzantes e o recoñecemento público ás alfombristas. A pregoeira, Carla Abad, reivindicou a identidade de Redondela e o deporte feminino como motores de unión e animou ás nenas a seren valentes “para romper calquera barreira”.
O Concello de Redondela inaugurou oficialmente esta tarde os actos institucionais da Festa da Coca 2026. A xornada inicial, de gran carga emotiva, congregou a veciñanza e visitantes para celebrar o recoñecemento dunha festividade declarada de Interese Turístico de Galicia. A concelleira de Cultura, Rita Pérez, foi a encargada de abrir o acto, e agradeceu o compromiso de toda a vila con esta tradición que é “orgullo memoria”. A pregoeira, Carla Abad, fixo un agradecemento a todas as persoas “que axudan a manter vivas as nosas tradicións” e tamén “a todos os clubs e asociacións deportivas e culturais polo seu traballo diario, que que ten un valor incalculable para a nosa vila”. Tamén animou ás nenas a seren valentes “para romper calquera barreira”.
Pola súa banda a alcaldesa, Digna Rivas, enxalzou a figura de Carla Abad como “un referente deportivo que abriu camiños para as mulleres” e fixo fincapé en que as Festas da Coca son máis que unha celebración “porque son a herdanza que recibimos das xeracións que nos precederon e a responsabilidade de mantelas vivas para as que virán” Durante a súa intervención, a rexedora tivo palabras de gratitude para o traballo da Concellería de Cultura e todo o persoal municipal que fai posible esta festa, así como un especial recoñecemento “ás alfombristas, danzantes das Espadas, ás Penlas e ás Burras, aos xigantes e cabezudos e a todas as persoas que fan posible que sintamos a mesma emoción cada ano”. O momento central do acto estivo dedicado ao tecido social que mantén viva a festa:
- Homenaxe a alfombristas: Recoñeceuse o traballo de Josefa e María Alfonso, Daniel Hidalgo, Carla Soutullo, Josefa Calvar, Milagros Barreiro e Carmen Lorenzo.
- Danza das Espadas: Rendeuse tributo ao antigo xefe de danzantes Bernardo Cobián. Así mesmo, homenaxeouse a Thomas e Xoel Schwarz e Fernando Santos, tres danzantes que pechan a súa etapa tras case vinte anos de traxectoria.
- Relevo das Penlas: Viviuse o simbólico paso de testemuño xeracional. Daniela Piñeiro entregou o gorro a Ashley Blanco, e Sabela Gómez fixo o propio con Ainara Migueles. Posteriormente, realizouse a entrega de alas a Martina Rodríguez e Mara Vidal, pechando o acto coa primeira representación do baile oficial.
A xornada remata esta noite co Concerto da Orquestra Panorama desde as 22.00 no Campo da Feira e a elaboración das Alfombras Florais polas rúas de Redondela.
