O Concello de Salvaterra de Miño ven de rematar as obras dos novos vestiarios no Campo de Fútbol do Oural, en Fornelos, un dos terreos de herba sintética cos que conta o municipio e onde adestran varios equipos locais.
Esta obra financiada a través do Plan de Infraestruturas Deportivas da Deputación Provincial e cofinanciada polo Plan +Provincia, por un valor de máis de 88.000 euros, tivo por obxectivo modernizar e ampliar os espazos dispoñibles co acondicionamento dos locais existentes debaixo das gradas para crear estes novos vestiarios e poder ampliar a oferta deportiva que ofrece a instalación.
Esta obra forma parte do Plan Estratéxico Municipal para a mellora das infraestruturas deportivas en Salvaterra, que contempla inversións por máis de 1.000.000 euros nos próximos anos co fin de continuar mellorando os servizos deportivos do municipio. Salvaterra de Miño segue apostando polo deporte e a mellora das súas infraestruturas como piares fundamentais para ofrecer mellores condicións aos seus deportistas e fomentar o acceso á práctica deportiva para todos os veciños e veciñas.
