Os actos centrais de conmemoración, que terán lugar o vindeiro 14 de agosto, consistirán nun obradoiro itinerante de iniciación á fotografía e un concerto.
Soutomaior ten xa todo listo para conmemorar a María Vinyals, unha das súas veciñas máis ilustres e figura de gran relevancia en todo o País, con motivo do 150 aniversario do seu nacemento, o 14 de agosto de 1875. Co obxectivo de rememorar a vida de Vinyals, coñecida como ‘A Marquesa Vermella’ pola súa alta implicación nas causas sociais e no seu trato próximo coas clases populares, a Concellería de Cultura ten preparadas unha serie de actividades.
Desde o vindeiro 14 de agosto ata o 14 de agosto de 2026 abrirase todo un programa de actos para conmemorar este 150 aniversario. Así, o vindeiro día 14 terá lugar un obradoiro itinerante de iniciación á fotografía, xa que a propia María Vinyals era unha gran amante da fotografía (mesmo contaba cunha cámara propia). O obradoiro comezará no Monte da Peneda, pasará polo Castelo de Soutomaior e rematará na capela de San Cidre (Peña de Franza), en Aranza. Para participar no obradoiro de fotografía haberá que inscribirse na páxina web do concello antes do 12 de agosto, xa que haberá prazas limitadas.
Ao remate deste obradoiro, sobre as 20:30 horas, terá lugar tamén na capela de San Cidre o concerto ‘María Vinyals no tempo’, que mesturará música con textos de María Vinyals e que será interpretado exclusivamente por mulleres: Estíbaliz Espinosa Río, soprano e poetisa; Isabel Gómez Alonso, pianista; e Rosa Vázquez Arias, violinista. O concerto será aberto a todo o público que se queira achegar.
Ademais deste programa de actividades para o 14 de agosto, dende hai meses a Concellería de Cultura traballa en propostas e iniciativas para conmemorar a Vinyals. Así, en xuño a Comisión Filatélica do Estado español aprobou a solicitude de facer un selo conmemorativo. Tamén en abril a Feira do Libro de Soutomaior acolleu a presentación de ‘Marquesa Vermella. Pequena biografía de María Vinyals’, de Polo Correo do Vento e que contou coa colaboración da concelleira de Cultura, Silvia Cernadas.
Precisamente a concelleira sinalou que “non se pode entender a historia de Soutomaior sen analizar a enorme influencia que tivo María Vinyals dende o punto de vista feminista e social. Os actos de conmemoración deste 150 aniversario do seu nacemento van supoñer un punto de inflexión no recoñecemento da súa figura a nivel municipal e estatal”.
Ademais, Silvia Cernadas adiantou que “desde o Concello estamos xa traballando para que o vindeiro 25 de outubro Soutomaior acolla un congreso internacional sobre a figura da ‘Marquesa Vermella’, que traerá a Soutomaior algúns e agunhas das maiores expertas sobre María Vinyals e que suporá unha oportunidade fantástica de coñecer máis sobre a vida e traxectoria dunha das nosas veciñas máis ilustre”.
