O Concello de Tomiño ten o pracer de anunciar unha iniciativa especial para o vindeiro domingo, no marco das festas do Alivio e adicada aos máis pequenos. Co fin de crear un ambiente inclusivo e accesible para todos, o son e a música das atraccións apagaranse de 18:00 a 20:00 horas. Esta medida lévase a cabo en colaboración coa comisión de festas e os propietarios das atraccións, que mostraron un gran compromiso coa inclusión de todos os nenos, especialmente aqueles con Trastorno do Espectro Autista.
A participación da asociación “Un MAIS”, integrada por pais e nais de nenos con TEA, foi fundamental na planificación desta actividade. A súa experiencia e coñecemento axudan a coñecer mellor as necesidades das familias e traballar conxuntamente para facer desta festa un espazo onde todos se sintan benvidos. Esta colaboración pon de manifesto o compromiso do Concello de Tomiño co fomento da inclusión e a diversidade nas nosas celebracións.
Como afirma Sandra González, alcaldesa de Tomiño “é fundamental que todas as familias, independentemente das súas circunstancias, poidan gozar das festas nun ambiente cómodo e agradable para elas. Esta acción non só busca concienciar sobre a importancia da inclusión, senón tamén promover un espazo onde todos os nenos e nenas poidan participar e gozar de actividades sen barreiras”.
Convidamos a toda a comunidade a sumarse a esta celebración, na que cada un de nós pode contribuír a que as festas sexan un momento de alegría e convivencia. Entre todos, fagamos de Tomiño un lugar onde todos, maiores e nenos, poidan sentir as festas como nosas, independentemente de cada condición. Esperamos ver a toda a cativada desfrutando dun día cheo de diversión e compañeirismo!
