O novo alcalde de Pazos de Borbén, Luciano Otero, reuniuse co Subdelegado do Goberno, Abel Losada, para demandar a construción dunha rotonda no Alto de Os Valos. Esta proposta afecta aos concellos de Redondela, Pazos de Borbén e Mos.
A reunión, que tivo lugar no día de hoxe, centrouse na necesidade de mellorar a seguridade viaria e a fluidez do tráfico nesta intersección clave. A construción dunha rotonda permitiría mellorar a seguridade viaria, reducir os tempos de viaxe, e facilitar o acceso ás áreas circundantes, nas que se atopan zonas industriais con elevado tráfico pesado.
O Alcalde Otero expresou a súa preocupación pola seguridade viaria neste punto e destacou a importancia desta iniciativa para toda a comunidade. “A creación dunha rotonda en Os Valos é unha medida reclamada dende fai tempo por todos os concellos afectados, crucial para garantir a seguridade dos condutores”, afirmou.
O Subdelegado do Goberno, Abel Losada, pola súa parte, mostrouse receptivo á proposta e comprometeuse a incluír na axenda de Fomento esta actuación. “E unha demanda que vemos xustificada, dada as características deste cruce, e veremos de iniciar os trámites para incluíla nos plans de Fomento”, declarou.
O Alcalde Otero tamén aproveitou a ocasión para solicitar información sobre a situación de dous proxectos, a A-59 e a A-57, que no seu momento estiveron incluídos nos plans do Ministerio e que lle afectan de cheo a Pazos de Borbén. “De momento non hai nada enriba da mesa a respectos destas infraestruturas” manifestaron dende a Subdelegación.
