O presidente provincial, acompañado pola deputada de Turismo, Nava Castro, detallou o contido dun plan que contempla a renaturalización da contorna, o deseño de novas rutas de sendeirismo, a recuperación do auditorio ou a organización dun gran evento anual
“Unha nova mostra da aposta da Deputación pola consolidación dun destino turístico sustentable e desestacionalizado, do coidado do noso patrimonio cultural e do compromiso cos concellos mobilizando fondos para atraer visitantes”, afirmou Luis López
O presidente da Deputación de Pontevedra, Luis López, vén de presentar este mércores o novo Plan Director do Parque do Castelo de Sobroso. Unha folla de ruta que recolle o investimento por parte do goberno provincial de 1,5 millóns de euros ao longo dos tres vindeiros anos co obxectivo de enriquecer a experiencia dos visitantes, mellorar e ampliar os servizos e consolidar o castelo de Sobroso e a súa contorna natural como un dos grandes atractivos turísticos da provincia. “Unha nova mostra da aposta desta Deputación pola consolidación dun destino turístico sustentable e desestacionalizado, do coidado do noso patrimonio cultural e histórico e do compromiso cos concellos mobilizando fondos para atraer visitantes”, explicou o mandatario provincial o que supón a aprobación deste novo plan e este investimento millonario para o Concello de Mondariz, a comarca do Condado e o conxunto da provincia.
Despois de poñer en valor o traballo dos traballadores do servizo de Turismo Rías Baixas e da deputada responsable desta área, Nava Castro, quen tamén estivo presente na presentación deste plan, o presidente da Deputación detallou polo miúdo algunhas das melloras que recolle o documento, que contou coa aportación de profesionais e colectivos relacionados co castelo para a súa elaboración. “É un proxecto que potenciará os atractivos turísticos desta fortaleza adaptándoa aos novos tempos e un plan de turismo sustentable, desestacionalizado e que potencia os tesouros do interior da nosa provincia”, sinalou o dirixente.
Por un lado, haberá unha intervención para renaturalizar e reordenar a contorna natural do castelo con especies autóctonas deseñando zonas diferenciadas, accesibles, sinalizadas e cunha iluminación adaptada; destinadas a especies botánicas, a ocio familiar, a actividades e talleres e á fauna propia deste lugar. Por outro lado, potenciaranse e deseñaranse catro novas rutas de sendeirismo encamiñadas a poñer en valor o patrimonio arqueolóxico, inmaterial, cultural e histórico de Sobroso. Do mesmo xeito, porase en marcha unha aula de natureza para recibir excursións escolares e de turistas da man de educadores ambientais que divulgarán a riqueza natural deste enclave.
Celebración dun gran evento anual
Un dos grandes atractivos deste plan pasa pola creación dun espazo para espectáculos e actividades culturais a través da recuperación do auditorio e escenario existentes para organizar concertos musicais, teatro, danza, recitais de poesía, teatro de títeres, espectáculos de circo ou cine ao aire libre. Neste punto, encaixa tamén o obxectivo de organizar un gran evento anual ligado á cultura.
Do mesmo xeito, está prevista a execución doutras accións como a mellora do museo do interior do castelo ou o deseño dun plan de comunicación para divulgar entre a poboación local e os turistas o seu valor histórico cultural e natural.
100 % Rías Baixas tamén por Semana Santa
“O Castelo de Sobroso é especial porque é un vestixio da nosa historia e do Reino de Galicia, porque ten unha riqueza paisaxística e natural sen igual e porque está no interior da provincia para recordarnos que temos unha provincia chea de tesouros que paga a pena descubrir”, destacou Luis López antes de situar este castelo e o seu parque como unha referencia para un turismo desestacionalizado e unha alternativa interesante ás propostas de sol e praia. “Aínda que chova como hoxe, aínda que non sexa verán, aínda que non vaiamos a praia, sempre hai unha experiencia 100 % Rías Baixas para desfrutar”, asegurou o presidente da Deputación, quen animou a visitar a provincia nesta Semana Santa para desfrutar do termalismo no balneario de Mondariz, da cultura e natureza no parque do Castelo de Sobroso ou das procesión de Semana Santa de concellos próximos como os de Baiona ou A Guarda.
