O representante da Consellería de Cultura, Lingua e Xuventude salienta esta celebración pola “importancia en uso e en prestixio” do emprego da nosa lingua no xornalismo
A Xunta de Galicia apoia unha nova edición do Día dos Medios en Galego, que organiza cada 7 de febreiro, a Asociación de Medios en Galego, e que, nesta ocasión, incluirá a publicación ese mesmo día dunha páxina web con 100 medidas para fomentar o uso do galego e a celebración dun concerto na Coruña coas actuacións de Leria e A banda da loba.
Así se anuncio hoxe na presentación da programación desta efeméride impulada pola Asociación de Medios en Galego e na que participou o secretario xeral da Lingua, Valentín García. Trátase dunha data que se celebra desde o ano 2018 coincidindo coa primeira publicación xornalística en lingua galega, O Tío Marcos d´a Portela, editada por Valentín Lamas Carvajal en 1876.
O representante da Consellería de Cultura, Lingua puxo en valor esta celebración para difundir e recoñecer o “valioso labor dos máis do centenar de medios que, a día de hoxe, usan a lingua galega para facer xornalismo” e expresou o seu desexo de que esta conmemoración “contribúa e anime a outros a incorporar cada vez máis o galego nesta actividade profesional, seguindo a estela marcada no seu día por Valentín Lamas Carvajal”.
Precisamente, a Asociación de Medios en Galego foi a encargada de elaborar, co apoio da Secretaría Xeral da Lingua, a páxina web que se fará pública o 7 de febreiro, e na que se recollen un cento de accións para fomentar o uso e prestixio do noso idioma. As medidas foron elaboradas a partir de entrevistas con diferentes actores da sociedade civil e a administración pública. Tamén para ese mesmo día, e a modo de conmemorar esta data como unha xornada festiva, celebraranse dous concertos na sala Playa Club da Coruña coas actuacións de Leira e A banda da Loba.
