— Ángeles Vázquez subliña que este é o terceiro encontro divulgativo que se celebra no parque do complexo dunar de Corrubedo e Lagoas de Carregal e Vixán, un programa co que se formou a case 170 persoas nos dous últimos anos
— A xornada, que reuniu en Ribeira a case medio cento de biólogos, técnicos ambientais e afeccionados á natureza, centrouse nos proxectos en marcha neste espazo natural con relación á píllara, á reintrodución da embigueira das dunas e do sapoconcho
A Xunta segue apostando pola divulgación e o fomento da investigación relacionada cos seis parques naturais existentes en Galicia como ferramentas efectivas para preservar a riqueza e a biodiversidade destes espazos protexidos, nos que a Consellería de Medio Ambiente e Cambio Climático investirá o próximo ano 1,3 millóns de euros a través de diferentes proxectos e actuacións de conservación.
Esta foi unha das mensaxes principais nas que incidiu a conselleira de Medio Ambiente e Cambio Climático, Ángeles Vázquez, durante a inauguración dunha xornada divulgativa e gratuíta que se celebrou hoxe no Centro de atención a visitantes Casa da Costa, localizado no Parque Natural complexo dunar do Corrubedo e lagoas de Carregal e Vixán.
Neste sentido, a responsable autonómica explicou que, no marco do Programa de investigación, seguimento e avaliación previsto nos correspondentes plans reitores de uso e xestión dos parques naturais galegos, este é o terceiro encontro divulgativo que se organiza no caso de Corrubedo desde o ano pasado, ao que se suman dous máis celebrados en 2023 no Parque Natural Baixa Limia-Serra do Xurés.
En total, segundo indicou Ángeles Vázquez, case 170 persoas recibiron xa formación e información de carácter científico-técnico sobre os diferentes proxectos e investigacións en marcha que teñen como fin afondar na fauna, na flora e nas características dos parques naturais galegos, cifra que seguirá incrementándose o próximo ano.
Así, a previsión é que ao longo de 2025 os centros de visitantes dos parques do Xurés, de Fragas do Eume e de Corrubedo acollan, como mínimo, outras tres xornadas divulgativas nas que se abordarán os estudos máis salientables nos que se vai traballar por parte da comunidade científica, co apoio e colaboración da Xunta.
Tras salientar o éxito cada vez maior das iniciativas de ciencia cidadá promovidas pola Consellería, a responsable autonómica salientou a elevada participación rexistrada nesta xornada, na que, entre outros temas, se expuxeron da man dos investigadores responsables os obxectivos do programa POCTEP Iberalex para a conservación da píllara das dunas no litoral atlántico ibérico, e dous casos de éxito que permitiron a reintrodución no parque de Corrubedo da embigueira das dunas, planta ameazada da provincia da Coruña, e do sapoconcho europeo, con escasa presenza en Galicia.
En concreto, preto de medio cento de persoas asistiron ao evento formativo celebrado hoxe na Casa da Costa, cun perfil moi variado e unha ampla representación de biólogos, profesionais e técnicos relacionados co medio ambiente e afeccionados á natureza.
Por iso, Ángeles Vázquez aproveitou a súa intervención para animar tamén a todos os asistentes a actuar como “axentes divulgadores” da riqueza e dos valores que definen o patrimonio natural galego e, máis concretamente, os seus espazos protexidos, tanto desde os seus respectivos eidos profesionais como na súa relación habitual coa contorna.
