Román Rodríguez participa na inauguración da peza, situada no paseo de Tizón
O conselleiro de Educación, Ciencia, Universidades e Formación Profesional, Román Rodríguez, acompañado pola delegada territorial da Xunta en Vigo, Ana Ortiz, e pola directora xeral de Formación Profesional, Eugenia Pérez, participou hoxe na inauguración da escultura Os Percebes, elaborada no Centro Integrado de Formación Profesional Cantería de Galicia. A peza foi cedida ao Concello de Baiona e instalada no paseo de Tizón.
Durante o acto, o conselleiro puxo en valor “o excelente traballo do alumnado e profesorado deste centro, feito con paixón, implicación e vocación”, e destacou que este tipo de iniciativas contribúen a poñer en valor e dar visibilidade aos oficios tradicionais, recoñecendo tanto a súa vertente cultural como económica.
A escultura, obra do alumno Manuel Todar, foi realizada en caliza e representa uns percebes. Conta cunhas dimensións de 114 cm de longo, 66 cm de ancho e 44 cm de alto (1,45 m coa peana) e un peso aproximado de 1.600 kg. Segundo subliñou o conselleiro, esta creación reflicte de maneira exemplar os coñecementos e habilidades adquiridos nas aulas ao longo do curso escolar.
Apostando pola visibilidade da FP
Román Rodríguez salientou que este tipo de colaboracións permiten dar visibilidade ao traballo que se realiza no CIFP Cantería de Galicia, centro de referencia na formación especializada en pedra. Neste sentido, lembrou outras pezas elaboradas recentemente, como a escultura da Virxe do Carmen, situada no porto pesqueiro do Berbés (Vigo), ou o escudo de España cedido á Brigada de Infantería Lixeira Aerotransportable (BRILAT), e instalado na base General Morillo, en Vilaboa.
O CIFP Cantería de Galicia ofrecerá no curso 2025/26 catro titulacións de alta especialización, con 96 prazas dispoñibles. En concreto, impartiranse os ciclos de Pedra Natural, FP Básica en Reforma e Mantemento de Edificios, e FP Dual Intensiva nas especialidades de Construción, Proxectos de Edificación, e o novo Ciclo Medio de Escavacións e Sondaxes Dual Intensivo.
