- A Plataforma de Contratos públicos de Galicia publica hoxe a licitación do contrato de adquisición para o seu futuro reparto a diferentes edificios xudiciais
- A adquisición destes novos equipos supón un investimento de arredor de 44.100 euros e con ela culmina o obxectivo de dotar todas as sedes con estas equipacións
A Plataforma de Contratos Públicos de Galicia publica hoxe a licitación para a subministración e instalación de 24 desfibriladores semiautomáticos en varios edificios xudiciais, como parte do compromiso da Xunta por salvagardar a saúde e seguridade tanto do persoal como da cidadanía que se atopen en calquera espazo público ou administrativo.
A duración do contrato de subministración durará dous meses a partir do día seguinte á data de formalización e o importe estimado é de arredor de 44.100 euros. As empresas interesadas en optar ao contrato poden facelo dende hoxe, 5 de agosto, ata o vindeiro 19 de agosto ás 14,00 horas. Para a adxudicación aplicarase o procedemento aberto “supersimplificado”.
A dotación de desfibriladores aos xulgados galegos comezou en 2022 de xeito progresivo e finaliza este ano, cun investimento total de máis de 50.000 euros. A Xunta considera esta dotación básica dentro do traballo que desenvolve a Administración de Xustiza para reforzar a seguridade tanto de todo o persoal traballador coma dos usuarios e das usuarias das dependencias xudiciais, xa que a actuación precoz cos medios axeitados resulta determinante para a recuperación e diminución das secuelas ante unha parada cardiorrespiratoria.
A medida enmárcase na necesidade de protexer a saúde cardiovascular da cidadanía, seguindo as recomendacións das autoridades sanitarias de contar con desfibriladores fóra do ámbito sanitario como é o caso dos edificios xudiciais.
Cómpre destacar que os DESA son aparatos electrónicos portátiles sinxelos de manexar que identifica e tratan a parada respiratoria. A súa efectividade radica na identificación automática dunha fibrilación ou taquicardia ventricular sen pulso restablecendo un ritmo cardíaco efectivo electricamente. Por iso, a Xunta tamén dota aos equipos de servizos de emerxencias da comunidade deste material necesario para moitas das súas intervencións e ofrece aos seus profesionais a formación necesaria para o seu manexo.
O Goberno galego aposta por unha xustiza con infraestruturas máis modernas e sostibles para que, de maneira progresiva, os edificios e xudiciais respondan á súa función sendo máis seguros, accesibles, funcionais e confortables. Ademais da dotación de desfibriladores, tamén se traballa na formación do persoal para o seu manexo, así como noutras melloras estruturais, tales como a instalación de arcos de seguridade, novas pechaduras ou mellora dos sistemas de iluminación e gravación dos edificios xudiciais.
