- O director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, visitaron hoxe este taller, especializado na elaboración das máscaras da tradicional Pantalla de Xinzo de Limia
- Aurora Dacal e Santiago Martínez son o equipo deste obradoiro —o único dedicado á elaboración de máscaras de Entroido inscrito en Artesanía de Galicia— que dedican parte do seu traballo a divulgar o seu oficio con cursos de formación
O director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, achegáronse esta mañá ata o obradoiro Arte Arrebol, situado en Xinzo de Limia, especializado na elaboración da máscara tradicional dunha das figuras máis recoñecibles do Entroido ourensán, a Pantalla de Xinzo.
Durante a súa visita —na que tamén estivo presente o alcalde do municipio, Amador Díaz— Alén destacou o papel deste obradoiro no mantemento, protección e impulso do entroido tradicional de Xinzo de Limia, que conseguen non só coa súa propia produción senón a través dos cursos de formación.
Arte Arrebol está formado polos artesáns Aurora Dacal e Santiago Martínez, que desde hai tres anos dedican parte do seu traballo á divulgación do seu oficio e á transmisión das técnicas tradicionais de elaboración das pantallas, co obxectivo de protexer o Entroido de Xinzo e de manter viva esta tradición. Para facer cada pantalla empréganse materiais coma o papel, a fariña, a auga, o cartón, o feltro e arredor de 60 horas de traballo.
Gabriel Alén destacou a riqueza dos entroidos tradicionais entre os que destacan os da provincia de Ourense, sendo o de Xinzo de Limia un dos referentes máis senlleiros.
