José González manifestou a preocupación polo futuro dos traballadores afectados en Galicia e reclamou unha maior información por parte do Goberno central, quen ten as competencias exclusivas na tramitación deste expediente
O conselleiro de Emprego, Comercio e Emigración, José González, manifestou o firme compromiso da Xunta coa creación e o mantemento dun emprego de calidade. Así o sinalou esta mañá no pleno do Parlamento, no marco da resposta a unha pregunta sobre o expediente de regulación de emprego anunciado pola empresa Circet Europe para os seus traballadores en España e cuxa tramitación, atendendo á normativa vixente, é competencia exclusiva do Goberno central ao tratarse dun grupo con centros de traballo repartidos por diferentes puntos da xeografía do Estado.
O titular de Emprego lamentou a decisión da compañía francesa e manifestou a preocupación polo futuro dos 118 traballadores que ten en Galicia. Neste senso, reclamou ao Executivo estatal unha maior transparencia e comunicación, atendendo ás demandas de información realizadas polo Executivo galego acerca da situación do procedemento co obxectivo de velar pola boa fe no proceso de negociación e pola salvagarda dos dereitos dos traballadores.
José González sinalou que Galicia permanecerá atenta á situación e reafirmou o compromiso por seguir avanzando na senda de fortalecemento que experimenta o mercado laboral galego e consolidando o emprego de calidade, no marco da aposta polo diálogo social.
