Está dirixida a profesionais do sector e incorpora como novidade este ano que se podan presentar as empresas de restauración ademais das de aloxamento
O edificio CINC da Cidade da Cultura acollerá o vindeiro luns, 21 de outubro, unha xornada informativa sobre as axudas para actuacións de eficiencia enerxética de empresas turísticas, dirixidas a profesionais do sector turístico galego. Organizada por Turismo de Galicia, a sesión comezará ás 10,00 horas, desenvolverase durante toda a mañá e poderase seguir en streaming a través da web de Turismo de Galicia no Espazo Profesional.
A Xunta celebra esta acción informativa para informar da liña de subvencións convocada o pasado mes de xuño que busca reforzar as medidas de eficiencia enerxética nas empresas turísticas galegas e que está en prazo ata o vindeiro 14 de novembro. O Goberno galego dotou estas axudas con 10M€ financiados con fondos europeos na procura da modernización e mellora da competitividade do sector turístico galego.
Os responsables das empresas e profesionais do sector interesados nesta xornada poden inscribirse antes do 18 de outubro en turismo@xunta.gal.
Un equipo técnico de Turismo de Galicia será o encargado de explicar os detalles desta convocatoria que inclúe como novidade que os establecementos de restauración poidan ser posibles beneficiarios ademais dos de aloxamento. Ademais, esta liña permite a rehabilitación enerxética de todo o edificio ou dunha parte (na anterior eran edificios completos), non se pide antigüidade mínima dos edificios para rehabilitar e non hai unha esixencia mínima de aforro enerxético, entre outras.
As axudas cubrirán ata o 70% do custo total subvencionable do proxecto, aínda que poderá chegar ao 80% ou 90% no caso de que se acrediten aforros de enerxía primaria non renovable dun 20 ou 30%. Os gastos subvencionables deberán estar realizados antes de abril de 2025.
