- A directora xeral de Promoción da Igualdade, Eloína Ingerto, visitou este espazo de información e atención que está aberto todos os días ata o peche do festival
- O Goberno galego tamén instalará este servizo no Festival de Ortigueira, no Portamérica, no Atlantic Fest, no Morriña Fest, no Río Verbena e no Caudal Fest
A directora xeral de Promoción da igualdade, Eloína Ingerto, visitou esta tarde o punto lila e arcoíris instalado no festival de música Portamérica, en Portas. Trátase dun espazo aberto desde o comezo ata o final do festival, a través do que a Xunta busca promover a igualdade de xénero, sensibilizar e ofrecer asesoramento.
O obxectivo, explicou a directora xeral, é achegar á cidadanía, e en especial á mocidade, ferramentas para concienciar, sensibilizar e prever calquera situación de violencia contra as mulleres ou contra o colectivo LGTBI. Deste xeito, nestes puntos ademais de información tamén se poden realizar actividades que promoven as masculinidades igualitarias, reforzan os vínculos afectivos e as dinámicas relacionais.
Neste sentido, Eloína Ingerto explicou que estes puntos contan con persoal especializado, tanto psicólogas como sexólogas, que ofrecen asesoramento a calquera persoa que o precise, asesoramento e acompañamento. Para isto, o punto lila e arcoíris conta con dous espazos diferenciados: un de sensibilización e información e outro destinado ás atencións individuais.
A directora xeral lembrou que, esta mesma semana o punto lila e arcoirís estivo no Festival de Ortigueira e esta fin de semana no Portamérica. A continuación estará no Atlantic Fest, no Morriña Fest, no Río Verbena e no Caudal Fest.
