- A Administración autonómica remitirá nas vindeiras semanas para tramitación ambiental o borrador do Peose que recolle un incremento da superficie do parque en máis de 160.000 m² máis, case a metade da estensión actual (412.331 m²)
- Xunta e Concello van consensuar solucións en materia de saneamento e dotación de recursos hídricos necesarios para dar servizo ao parque, un paso necesario para avanzar na tramitación ambiental
- Nos vindeiros anos poñeranse á disposición das empresas case tres millóns de metros cadrados de solo empresarial na provincia de Pontevedra
A Xunta de Galicia remitirá nas vindeiras semanas para tramitación ambiental o borrador do Plan Estruturante de Ordenación do Solo Empresarial (Peose) para a ampliación do polígono do Campiño en 160.045 m² máis, case a metade da superficie actual (412.331 m²), na que as 86 parcelas dispoñibles xa están ocupadas.
A directora xeral de Estratexia Industrial e Solo Empresarial, Margarita Ardao, mantivo esta semana unha reunión co concelleiro de Urbanismo do Concello de Pontevedra, Alberto Oubiña, para informar do contido definitivo do Peose e consensuar solucións en materia de saneamento e dotación de recursos hídricos necesarios para dar servizo ao parque, un paso necesario para avanzar na tramitación ambiental.
De feito, segundo informou a director, durante a redacción do Peose houbo que adaptar a planificación inicial debido a que se detectaron distintas afeccións sectoriais que condicionan a posibilidade de desenvolver o ámbito completo previsto no Plan Sectorial de Ordenación de Áreas Empresariais de Galicia.
Máis solo empresarial na comarca de Pontevedra
A Xunta de Galicia, a través de Xestión do Solo de Galicia (Xestur) está a impulsar diferentes proxectos para dotar a comarca de Pontevedra de solo empresarial necesario que contribúa ao seu desenvolvendo económico, facilitando o asentamento de novas iniciativas empresariais ou a ampliación das xa existentes.
Neste contexto, o pasado mes de maio adxudicou o proxecto de urbanización de 86.964 m2 no antigo Centro de Transporte e Terminal Intermodal de Ponte Caldelas (Pontevedra), que está ao carón do Polígono do Campiño e o parque empresarial da Reigosa (Ponte Caldelas). Ademais, ese mesmo mes remitiu a tramitación ambiental o proxecto do PEOSE do Parque Empresarial de Fragamoreira (Poio), que sumará 374.229 metros cadrados máis de solo para uso industrial.
Case 3 millóns de metros cadradosen tramitación na provincia de Pontevedra
Esta iniciativa é complementaria con outros desenvolvementos urbanísticos de solo empresarial que a Xunta de Galicia está a promover na provincia de Pontevedra. Así, está a desenvolver a Fase IV do parque empresarial de Lalín 2000 (316.960 m2), que ten superado proceso de información pública o seu proxecto de urbanización. Ademais, a ampliación do parque empresarial de Toedo (A Estrada), con 156.685 metros cadrados e o de Louredo-Mos, con 479.464 m2, superaron a fase ambiental dos seus instrumentos de ordenación.
En definitiva, nos vindeiros anos porase á disposición das empresas case tres millóns de metros cadrados de solo empresarial na provincia de Pontevedra. Por outra banda, actualmente están en licitación a redacción do Peose da ampliación do polígono industrial do Pousadoiro en Vilagarcía de Arousa, cunha previsión de ampliar 212.254 m2 de solo industrial; e a licitación da denominada MI, área multifuncional industrial, da Plisan coa previsión de ampliala en 1,1 millóns de metros cadrados.
