A directora xeral de Enerxías Renovables e Cambio Climático, Paula Uría, e o director xeral de Planificación Enerxética e Minas, Pablo Fernández, participaron no II Encontro UNEF de Directores Xerais de Enerxía das Comunidades Autónomas
A directora xeral de Enerxías Renovables e Cambio Climático, Paula Uría, e o director xeral de Planificación Enerxética e Minas, Pablo Fernández, subliñaron hoxe a necesidade de que o Ministerio para a Transición Ecolóxica e o Reto Demográfico escoite ás Comunidades Autónomas para conseguir un desenvolvemento adecuado dos proxectos enerxéticos.
Uría e Fernández participaron hoxe no II Encontro UNEF de Directores Xerais de Enerxía das Comunidades Autónomas onde se abordaron diversas problemáticas no ámbito enerxético, como a importancia dunha nova planificación eléctrica da rede de transporte que dea resposta ás necesidades industriais e enerxéticas, a relevancia de convocar concursos de xeración e demanda, ou fomentar o almacenamento e o autoconsumo.
Así mesmo, puxeron de manifesto a importancia de trasladarlle ao Ministerio para a Transición Ecolóxica e o Reto Demográfico que aclare o carácter de ferramenta orientativa e non vinculante do documento aprobado no 2023 sobre a zonificación ambiental da implantación de enerxías renovables.
Ambos os dous representantes da Xunta destacaron a importancia deste tipo de encontros que permiten propoñer solucións conxuntas a problemas comúns das Comunidades Autónomas, como pode ser a situación de bloqueo xudicial do sector eólico, e a situación da cuestión prexudicial interposta ante o Tribunal de Justicia de la Unión Europea (TJUE) que afecta a todos os proxectos que están sometidos a avaliación de impacto ambiental, e apelaron á necesidade de que o Ministerio manteña unha interlocución fluída cos gobernos rexionais.