- Entre as principais novidades da convocatoria, cómpre destacar que por primeira vez unha praia da provincia de Ourense, a dos Franceses (A Veiga), lucirá este distintivo
- O municipio pontevedrés de Sanxenxo volve liderar un ano máis a clasificación nacional de praias galardoadas, cun total de 18, seguido de Vigo, con 12
- Bastiagueiro, en Oleiros, é un dos sete areais en todo o mundo que mantén este recoñecemento desde o ano 1987 de forma consecutiva e ininterrompida
- A Asociación de educación ambiental e do consumidor (Adeac) tamén premia a calidade dun total de 11 portos deportivos galegos e 18 centros de interpretación e aulas da natureza das 3 provincias costeiras, dos cales 2 nunca foran galardoados
- En total, Galicia lucirá este ano 219 distintivos azuis entre praias, áreas portuarias, instalacións para visitantes e sendeiros, o que a coloca por primeira vez na segunda posición da clasificación a nivel nacional, só por detrás de Valencia (228)
- Ángeles Vázquez salienta a boa posición da Comunidade, cun balance que reflicte a súa aposta polo coidado ambiental e por dar a coñecer os recursos do litoral como un incentivo máis para impulsar o turismo sostible e respectuoso coa contorna
Galicia terá este ano un total de 118 praias en 38 municipios galardoadas coa bandeira azul, un distintivo de carácter internacional co que a Asociación de educación ambiental e do consumidor (Adeac) recoñece anualmente a areais de todo o mundo seleccionados en base a unha serie de rigorosos criterios de sustentabilidade, accesibilidade e servizos.
Desde xeito e con 10 distintivos máis que o ano anterior, Galicia concentra case unha de cada sete bandeiras concedidas en España (794) e consolida a súa posición entre as tres comunidades que reciben un maior número de distintivos para as súas praias, xunto con Valencia (que suma 197) e Andalucía (184).
Dos 118 areais galegos galardoados na presente edición, cómpre subliñar que, por primeira vez, unha praia fluvial da provincia de Ourense —a dos Franceses, no concello da Veiga— recibirá a bandeira azul.
A este fito histórico na Comunidade hai que sumar os outros tres areais que estrearán distintivo: Niñóns, en Ponteceso; O Laño, en Poio; e Pampaído, en Sanxenxo, municipio que, de feito, suma unha praia respecto a 2025. Ademais, outras seis —Ponzos, en Ferrol; A Concha e Morouzos, ambas en Ortigueira; Coroso, en Ribeira; A Pasada, en Barreiros e Loira, en Marín— recuperan a bandeira que non luciron no período anterior.
Así mesmo, Adeac tamén deu a coñecer esta mañá a relación de portos deportivos que ondearán a bandeira azul. Das 111 instalacións recoñecidas en todo o país, 11 están en Galicia, o que a converte na quinta comunidade con máis instalacións recoñecidas.
Ademais, como novidade, o xurado resolveu conceder as bandeiras azuis a praias e portos deportivos por un período de dous anos (2026-2027) para adaptarse aos novos requisitos de acreditación internacionais e aos cambios normativos da UE. O galardón outorgado, en todo caso, seguirá estando condicionado ao cumprimento dos criterios de concesión exixidos durante todo o período, polo que se fará un seguimento anual e os correspondentes procesos de verificación durante 2027.
De igual xeito, un ano máis recoñeceu tamén o labor dos chamados centros azuis, categoría na que se engloban aulas de natureza e de mar, centros de recepción de visitantes e instalacións de investigación ou similares dedicadas á educación ambiental en municipios relacionados co programa Bandeira Azul. Dos 106 centros azuis galardoados en todo o país en 2026, 18 están en Galicia (1 máis que na convocatoria anterior), que é a terceira comunidade con máis distincións neste eido, só por detrás de Valencia (con 26) e Andalucía (19).
Neste apartado, destacan dúas novas incorporacións á listaxe de centros azuis galegos. Trátanse, en concreto, das sedes de Vigo e da Coruña do Centro Oceanográfico de Vigo do Instituto Español de Oceanografía, que estrean bandeira.
Cómpre subliñar que os criterios esixidos por Adeac para a concesión da bandeira azul, no caso de praias e portos, están relacionados coa calidade das augas —que ten que ser excelente—; a seguridade e a accesibilidade; a dotación de servizos; así como a xestión ambiental e a sustentabilidade. Pola súa parte, os centros azuis deben fomentar a educación ambiental no litoral, o coñecemento da contorna e as alternativas de ocio.
Tras darse a coñecer hoxe a relación de praias, portos e centros galardoados, a conselleira de Medio Ambiente e Cambio Climático, Ángeles Vázquez, salientou a boa posición que ocupa Galicia un ano máis a nivel nacional, uns resultados que enmarcou na aposta da Xunta polo coidado ambiental e a divulgación dos recursos naturais que conforman o litoral máis extenso de todo o país e que converten á Comunidade “nun lugar único” para visitar de forma sostible e respectuosa coa contorna.
Datos a nivel provincial
Por provincias, Pontevedra concentra un ano máis o maior número de bandeiras azuis de Galicia: 56 que recaen noutras tantas praias e 6 en instalacións portuarias. No caso da Coruña, os galardoados foron 44 areais (5 máis que en 2025, sendo a provincia na que se produciu o maior incremento) e 4 portos; e no de Lugo, recoñeceuse con este distintivo a 17 praias e 1 porto. Ademais, hai que sumar a primeira bandeira azul para Ourense.
Sanxenxo volve repetir como o municipio español con máis areais galardoados, un total de 18. O concello pontevedrés recibe, ademais, 3 distincións para outros tantos portos. Ademais, cómpre subliñar o caso de Vigo, a cidade galega que recibe máis bandeiras para as súas praias (12) e o segundo municipio de España nesta clasificación, ademais de ter tamén 1 porto e 1 centro recoñecidos. Son os únicos municipios galegos na listaxe de municipios de España con maior número de bandeiras en areais e portos.
Na provincia da Coruña, Arteixo é o que segue a concentrar o maior número de bandeiras, con 6 praias e 1 centro azul; seguida da cidade de Ferrol, que ao recuperar unha praia colócase tamén con 6 bandeiras, da cidade da Coruña —5 areais e 1 porto— e de Oleiros, con 5 praias distinguida —entre elas a de Bastiagueiro, que é unha das sete en todo o mundo que logra manter a bandeira azul desde 1987— e 2 centros azuis.
Así mesmo, Foz é o concello lucense con máis areais galardoados, 5 en total; seguido de Barreiros, con 3 praias; Burela, con 2 praias e 2 centros azuis; Ribadeo, que suma 2 praias con bandeira e o único porto distinguido nesta provincia; e O Vicedo, con 2 areais recoñecidos no marco da actual convocatoria.
Líder en sendeiros azuis
Por último e con relación aos chamados sendeiros azuis, cómpre precisar que, por quinto ano consecutivo, Adeac convocou estes distintivos como un programa independente ao de Bandeira Azul co que se busca poñer en valor o papel das sendas como un recurso valioso para gozar da natureza e aprender a interpretar a contorna.
Os resultados da última convocatoria déronse a coñecer o pasado mes de febreiro e consolidan a posición de liderado absoluto de Galicia nesta categoría xa que é a comunidade que concentra 72 dos 194 itinerarios galardoados en todo o país —é dicir, 18 máis que os que recibiu en 2025—.
En total e sumando praias, portos, centros de visitantes e sendeiros distinguidos por Adeac, Galicia atesoura 219 galardóns, un balance que a sitúa xa como a segunda comunidade española que concentra máis recoñecementos deste tipo, só por detrás de Valencia (228) e superando por primeira vez a Andalucía, que suma 204 distintivos azuis en total e cae á terceira posición da clasificación nacional.
A continuación detállanse os galardóns concedidos en 2025 en Galicia no marco do programa Bandeira Azul, diferenciando entre praias, portos e centros azuis e resaltando cun * aqueles que o reciben por primeira vez.
| PORTOS CON BANDEIRA AZUL 2026-2027 | ||
| A Coruña | A Coruña | Real Club Náutico A Coruña-Marina Real |
| Sada | Club Náutico Sada | |
| Porto Deportivo Sadamar | ||
| O Porto do Son | Real Club Náutico de Portosín | |
| Lugo | Ribadeo | Porto Deportivo de Ribadeo |
| Pontevedra | Baiona | Monte Real Club de Iates de Baiona |
| O Grove | Porto Deportivo Pedras Negras | |
| Sanxenxo | Real Club Náutico Sanxenxo | |
| Club Náutico Portonovo | ||
| Porto Deportivo Juan Carlos I | ||
| Vigo | Liceo Marítimo de Bouzas | |
| CENTROS AZUIS 2026 | ||
| A Coruña | A Coruña | Centro Oceanográfico da Coruña do Instituto Español de Oceanografía (IEO CSIC) * |
| A Laracha | Centro de interpretación dos Muíños de Auga da Costa da Morte Golmar | |
| Arteixo | Museo-Centro de interpretación Mar de Sorrizo | |
| Camariñas | Centro de visitantes do Faro de Cabo Vilán | |
| Museo Man de Camelle | ||
| Oleiros | Aula do Mar do centro de interpretación do Monumento Natural Costa de Dexo-Serantes | |
| CEIDA: Centro de Extensión Universitaria e Divulgación Ambiental de Galicia | ||
| Lugo | Burela | Centro de Educación Medioambiental Gaia |
| Barco Museo Reina del Carmen | ||
| Pontevedra | A Illa de Arousa | Centro de interpretación da Conserva |
| Baiona | Centro de interpretación ambiental Foz do Miñor | |
| Bueu | Aula de Natureza Cabo Udra | |
| Centro de interpretación do litoral de Agrelo | ||
| Estaleiro de Purro | ||
| Marín | Centro de interpretación dos petróglifos de Mogor | |
| Poio | Casa Museo de Colón | |
| Vigo | Visor submarino Nautilus (Autoridade Portuaria de Vigo) | |
| Centro Oceanográfico de Vigo do Instituto Español de Oceanografía (IEO CSIC) * | ||
