Esta cantidade enmárcase na convocatoria de 2021 destas achegas cofinanciadas polo Fondo Europeo Marítimo e de Pesca que publicará nos vindeiros días o ‘Diario Oficial de Galicia’
Poderán optar a estas subvencións os propietarios de buques pesqueiros e as súas organizacións -incluídas as confrarías- que conten coa colaboración dun organismo científico que desenvolva as operacións e valide o seu resultado
A Consellería do Mar pon a disposición do sector pesqueiro máis de 1,6 millóns de euros en axudas para desenvolver proxectos innovadores. Esta cantidade, que se distribúe nas anualidades 2021 e 2022, enmárcase na convocatoria de 2021 destas achegas cofinanciadas polo Fondo Europeo Marítimo e de Pesca (FEMP), tal e como recolle a orde que publicará o Diario Oficial de Galicia (DOG) nos vindeiros días.
Poderán optar a estes apoios os propietarios de buques pesqueiros e as súas organizacións ou asociacións -incluídas as confrarías de pescadores- que conten coa colaboración dun
organismo científico que desenvolva as operacións e valide o seu resultado. Terán a
consideración de organismo científico ou técnico os incluídos no rexistro creado ao abeiro do real decreto polo que se regulan os Centros Tecnolóxicos e os Centros de Apoio á
Innovación Tecnolóxica. Tamén poderán validar os resultados os Organismos públicos de
investigación (OPI) indicados na Lei da Ciencia, a Tecnoloxía e a Innovación, os recoñecidos
pola normativa propia das comunidades autónomas e as universidades públicas e privadas
ou entidades do sector público que desenvolvan actividades de I+D+i.
Esta convocatoria comprende dúas liñas de axuda diferentes. Unha delas é para proxectos
innovadores que busquen desenvolver ou introducir produtos e equipos, procesos e técnicas
ou sistemas de xestión ou organización novos ou perfeccionados e a ela destínanse 810.000
euros. A outra liña de axudas conta con 800.000 euros e enfócase a operacións innovadoras
relacionadas coa conservación dos recursos biolóxicos mariños que contribúan á eliminación
gradual dos descartes e as capturas accesorias e á introdución de técnicas de pesca
perfeccionada e de artes máis selectivas.
Algúns exemplos de accións de colaboración entre o sector pesqueiro e os organismos
científicos susceptibles de poder acollerse a estas achegas son as tecnoloxías para a
dixitalización dos datos para a identificación e cuantificación de especies e biomasa descartada e o desenvolvemento de sistemas de clasificación e cuantificación de capturas.
Outros exemplos son o desenvolvemento de procesos de valorización dos descartes pesca que abran novas oportunidades comerciais ou aparellos de pesca innovadores e máis selectivos.
Con estas subvencións, a Xunta busca impulsar a competitividade e a sustentabilidade
medioambiental do sector. Así, a través delas subvencionarase con carácter xeral o 50% dos
investimentos que fagan os propietarios de buques pesqueiros e as súas organizacións en
proxectos e operacións innovadoras. Esa porcentaxe pode chegar ao 100% cando se trate
de proxectos de interese colectivo, cun beneficiario colectivo e con características
innovadoras a escala local.
