- Salienta o récord de participación, con máis de 1.250 alumnos e docentes implicados, e agradece a confianza das empresas na formación que se dá nestas ensinanzas
- Un total de 14 centros educativos de toda Galicia resultan premiados por traballos que dan resposta a retos tecnolóxicos de 20 empresas
- As propostas premiadas incorporaranse á área de emprendemento do Centro Galego da Innovación da FP Eduardo Barreiros para o seu desenvolvemento
O conselleiro de Educación, Ciencia, Universidades e FP, Román Rodríguez, destacou hoxe o programa InnovaTech FP como “un escaparate da I+G+i, a investigación e a innovación que se desenvolve na FP galega”. Na entrega dos premios da terceira edición do programa, na que estivo acompañado pola directora xeral de FP, Eugenia Pérez, o titular do departamento educativo da Xunta de Galicia lembrou que deste certame naceu xa a primeira patente da FP galega, así como unha empresa. Isto demostra que estas ensinanzas “son unha oportunidade para o emprendemento do alumnado e tamén para o desenvolvemento dos sectores produtivos de Galicia”, incidiu.
Román Rodríguez salientou o récord de participación nesta terceira edición, con 254 equipos inscritos, compostos por 1.016 alumnos e alumnas e arredor de 240 docentes coordinadores. “É dicir, máis de 1.250 membros da comunidade educativa galega implicados en analizar os retos propostos polas empresas, investigar posibles solucións, poñelas en práctica e elaborar unha proposta final”, dixo. “Son un gran exemplo da Galicia Calidade que facemos entre todos”, engadiu.
Así mesmo, agradeceu a confianza das 20 empresas participantes no programa na FP galega. “Moitos dos que estades hoxe aquí repetides experiencia no programa InnovaTech, o que demostra que esta iniciativa funciona para todas as partes implicadas”, sinalou Román Rodríguez.
O conselleiro rematou felicitando a todos os participantes e, moi especialmente aos 14 centros galardoados. Entre eles, destaca o Centro Integrado de FP Valentín Paz Andrade (Vigo), que obtivo o premio especial desta edición pola resolución do reto de Naturgy. Grazas a isto, visitarán o Centro de control de Hidráulicas da empresa en Ourense, viaxarán a Madrid para coñecer as instalacións da compañía e achegaranse ao Museo Bolarque, en Guadalajara, dedicado á industria eléctrica.
Cómpre destacar tamén que o CIFP Ferrolterra (Ferrol) acada catro premios, o CIFP A Carballeira-Marcos Valcárcel (Ourense) tres e o CIFP Politécnico de Santiago (Santiago de Compostela) e o IES Politécnico de Vigo (Vigo) outros dous cada un.
Ademais, as 20 propostas premiadas incorporaranse á área de emprendemento industrial do Centro Galego da Innovación da FP Eduardo Barreiros, onde contarán cos medios dispoñibles para a súa incubación e aceleración, de tal forma que poidan derivar na creación de empresas innovadoras e de base tecnolóxica.
A relación de centros premiados e retos e a reflectida na seguinte táboa:
| EMPRESA | RETO | CENTRO GAÑADOR |
| 1-Naturgy | Presas con Futuro: Enerxía e Natureza en Equilibrio. | CIFP Valentín Paz Andrade (Vigo). Premio especial InnovaTech 2026 |
| 2-L’Oreal | Innovación dixital para a xestión integral de salóns de perruquería | IES de Teis (Vigo) |
| 3-Veolia | Economía circular a través da peletización de residuos de desbaste | CIFP Ánxel Casal-Monte Alto (A Coruña) |
| 4-Finsa | Valorización e novos usos das virutas de madeira de piñeiro | CIFP Politécnico de Santiago (Santiago de Compostela) |
| 5-elPulpo | Aplicación para a medición da rendibilidade do mobiliario en puntos de venda | IES García Barbón (Verín) e CIFP A Carballeira-Marcos Valcárcel (Ourense) |
| 6-Fundación San Rosendo | A musicoterapia como ferramenta de benestar integral | CIFP As Mercedes (Lugo) |
| 7-Diesemm | Plataforma intelixente para o impulso do turismo deportivo | CIFP Universidade Laboral (Culleredo) |
| 8-Repsol | Trazabilidade intelixente de equipos e repostos no taller de instrumentación | CIFP Montecelo (Pontevedra) |
| 9-EBA | Sistema de trazabilidade loxística e de procesos en fábrica de mobiliario de alta gama | CIFP Ferrolterra (Ferrol) |
| 10-Grupo Cuevas | Sistema de reciclaxe, depuración e aproveitamento da auga en procesos de pelado e cocción de castañas | CIFP Ferrolterra (Ferrol) |
| 11-WindWaves | Sistema automático para a montaxe e axuste de tubos en jackets offshore | CIFP Ferrolterra (Ferrol) |
| 12-Grupo Gestán | Solucións circulares para a valorización de residuos complexos | CIFP Someso (A Coruña) |
| 13-Quescrem | Identificación de canles colmatadas en membranas de ultrafiltración mineral e sistemas de limpeza non invasivos | IES Politécnico de Vigo (Vigo) |
| 14-HP | Plataforma de vixilancia intelixente do tráfico marítimo en augas galegas | CIFP A Carballeira-Marcos Valcárcel (Ourense) |
| 15-Applus+ | Sistema de medida efectiva de caudais de baixo custo en colectores de saneamento eQsan+ | CIFP Politécnico de Santiago (Santiago de Compostela) |
| 16-Porto-Muiños | Aplicación interactiva para descubrir o potencial gastronómico das algas | CIFP A Carballeira-Marcos Valcárcel (Ourense) |
| 17-GRI Towers Galicia | Visión artificial para a detección de defectos en láminas de aceiro de gran espesor | IES Manuel Chamoso Lamas (O Carballiño) |
| 18-CIE Galfor | Deseño de garras para a manipulación de pezas de forxa de aluminio sen marcas superficiais | IES Politécnico de Vigo (Vigo) |
| 19-Rodríguez López Auto | Mellora de unións multimaterial a base selante | IES O Ribeiro (Ribadavia) |
| 20-Grupo Intaf | Carro de ferramentas autónomo | CIFP Ferrolterra (Ferrol) |
Asesoramento do Eduardo Barreiros
O programa InnovaTech TP divídese en dúas fases. Na primeira delas, os centros inscritos reciben información sobre as actividades nas que as empresas presentan a alumnado e docentes os diferentes retos. Así mesmo, facilítaselles formación en metodoloxías áxiles para impulsar o proceso creativo e adquirir coñecemento clave que lles permitan afrontar os desafíos proposto e introducir innovación en produtos, servizos e modelos de negocio, entre outras competencias, a partires das que elaboran as súas propostas de solución aos retos das empresas.
Unha vez seleccionados os proxectos que pasan á segunda fase, os centros desenvólvenos co apoio técnico do Centro Galego da Innovación da FP Eduardo Barreiros. Nesta segunda etapa reciben, a maiores, formación en técnicas clave como o prototipado, a creación dun produto mínimo viable, a validación de produtos ou técnicas de comunicación e marketing. Presentadas as propostas finais, os equipos realizan unha exposición das mesmas nunha xornada para que a comisión de selección escolla as solucións gañadoras que hoxe reciben o premio.
