Sostén que cómpre seguir loitando para “que a igualdade básica entre todos os españois se manteña”
Avoga por poñer en marcha políticas públicas en materia de vivenda deixando a un lado a demagoxia
Aposta por impulsar o desenvolvemento industrial ao tempo que se preserva o medio ambiente
O presidente da Xunta, Alfonso Rueda, defendeu hoxe unha reforma do financiamento autonómico que se negocie nun marco multilateral, incidindo en que “calquera proxecto que haxa de financiamento enténdese no conxunto das comunidades autónomas”. Así o sinalou esta tarde durante a súa participación nun debate coa presidenta das Illes Balears, Marga Prohens, e co presidente de Canarias, Fernando Clavijo, celebrado no marco do Foro La Toja- Vínculo Atlántico.
“O primeiro reto que temos é seguir loitando para que a igualdade básica entre todos os españois se manteña”, apuntou o presidente do Goberno galego, quen resaltou que os pactos singulares o que fan “é detraer o que é de todos”.
Alfonso Rueda indicou que outro dos desafíos aos que se enfrontan as comunidades na actualidade é a vivenda. A este respecto, fixo fincapé na necesidade de desenvolver políticas públicas e “apartar demagoxias”. Así, a Administración autonómica traballa co obxectivo de duplicar o número de vivendas públicas ata chegar ás 8.000 nesta lexislatura. Por outra banda, o presidente autonómico lembrou que dos 313 concellos cos que conta Galicia “non hai nin un só que pedise a declaración de zona tensionada”.
Durante o debate, o presidente de Galicia tamén apuntou ao “falso dilema” entre medio ambiente e industria, sinalando que é “perfectamente posible” preservar o territorio e ao mesmo tempo “favorecer o desenvolvemento económico”, apoiando aos empresarios e emprendedores para que se poidan instalar na Comunidade e crear riqueza.