- Asegura que este distintivo recoñece o compromiso dos municipios e os veciños “con ter un concello fermoso e sostible”, exemplo do que significa “Galicia Calidade”
- Un total de 33 municipios acadan este recoñecemento este ano, un 40% máis que na pasada edición
- Avanza que a Xunta creará no 2026 a Rede de Concellos Bandeira Verde de Galicia, que permitirá compartir boas prácticas e desenvolver proxectos conxuntos
- Enmarca esta iniciativa na nova Estratexia Galega da Paisaxe Horizonte 2030, que integrará a protección da paisaxe en áreas como a ordenación do territorio, a mobilidade ou o turismo
O presidente da Xunta, Alfonso Rueda, acompañado da conselleira de Medio Ambiente e Cambio Climático, Ángeles Vázquez, participou hoxe en Mos na entrega de Bandeiras Verdes de Galicia, un acto que destacou como un exemplo do compromiso dos concellos e a súa veciñanza. “Este é un acto de amor pola nosa terra, no que enviamos unha mensaxe de que non só os responsables municipais senón o conxunto dos veciños están comprometidos con ter un concello fermoso e sostible. Concienciados con esa mentalidade verde de Galicia fermosa, Galicia bonita, de esa Galicia Calidade”, indicou.
A Bandeira Verde de Galicia, creada pola Xunta en 2020, consolidouse como un distintivo pioneiro a nivel estatal. Galicia foi a primeira comunidade autónoma en contar cun selo propio que distingue o esforzo local pola paisaxe, a eficiencia enerxética, a educación ambiental e a xestión responsable dos recursos. Nesta sexta edición acádase unha cifra récord, con 33 concellos recoñecidos, case un 40% máis que o ano pasado.
A Coruña é a provincia con máis concellos galardoados nesta edición (15 en total), mentres que Lugo, Ourense e Pontevedra contan con seis localidades recoñecidas cada unha. Para o xefe do Executivo autonómico, esta distribución amosa que a Bandeira Verde é unha ferramenta que impulsa a cohesión territorial, xa que permite que municipios de interior e do rural teñan as mesmas oportunidades de visibilidade que os costeiros.
O presidente salientou o papel de Mos, que este ano se incorpora á lista de concellos distinguidos. A localidade foi recoñecida pola presentación de once iniciativas sostibles, entre elas o Plan de Acción polo Clima e a Enerxía Sostible, proxectos de mobilidade activa, medidas de eficiencia enerxética, xestión responsable da auga e programas de educación ambiental.
Durante o acto, Rueda avanzou que en 2026 a Xunta creará a Rede de Concellos Bandeira Verde de Galicia, unha estrutura de cooperación que permitirá compartir boas prácticas, desenvolver proxectos conxuntos e ofrecer apoio técnico e económico aos municipios adheridos. A Rede contará tamén cun foro anual de expertos e cunha páxina web de referencia, co obxectivo de reforzar o posicionamento de Galicia en Europa como territorio comprometido coa paisaxe e a sostibilidade.
O titular do Goberno galego enmarcou esta iniciativa na nova Estratexia Galega da Paisaxe Horizonte 2030, que o Instituto de Estudos do Territorio, dependente da Consellería de Medio Ambiente e Cambio Climático, está a elaborar e que marcará as políticas públicas dos vindeiros anos. A estratexia integrará a protección da paisaxe en ámbitos como a ordenación do territorio, a mobilidade, o turismo e a educación, co propósito de facer da paisaxe un eixo transversal do desenvolvemento sostible e da identidade galega. O presidente salientou que o obxectivo da Xunta é que “a conservación da paisaxe que é tanto como dicir a conservación de Galicia e dos seus concellos estea en todas as políticas transversais”.
