- Sinala que, nun escenario marcado polas novas tecnoloxías, o “vello oficio” de contrastar e preguntar é “máis imprescindible que nunca”
- Define ao galardoado como un “documentalista que toma nota do seu tempo” e loa a súa capacidade para conectar coas preocupacións reais da xente
- Destaca a traxectoria do Grupo El Progreso como “unha testemuña privilexiada de como foi cambiando Galicia” e subliña que representa o selo ‘Galicia Calidade’
O presidente da Xunta, Alfonso Rueda, reivindicou hoxe o papel fundamental do xornalismo como un piar imprescindible para defender a calidade democrática e o dereito da cidadanía a recibir información contrastada. Durante a súa intervención na entrega do XXXIII Premio Puro Cora, que este ano recaeu no xornalista Rafa Cabeleira, Rueda salientou que, nun momento de cambios profundos impulsados polas novas tecnoloxías, o xornalismo profesional é “máis imprescindible que nunca”. Neste sentido, instou a protexer o “vello oficio” de preguntar, escoitar e contrastar.
En referencia ao galardoado, o responsable do Executivo autonómico destacou tanto a súa calidade literaria como a súa capacidade para conectar coas preocupacións reais da xente. Así, definiuno como un “documentalista que toma nota do seu tempo” sinalando que Rafa Cabeleira explica “maxistralmente” o pequeno para “entender o máis grande, o máis global, que non ten por que ser máis sinxelo”.
O xornalismo como piar democrático
O titular do Executivo galego fixo un recoñecemento especial a quen outorga este recoñecemento, o Grupo El Progreso, fundado hai case 120 anos por Purificación de Cora como “unha testemuña privilexiada de como foi cambiando Galicia”.
Para o presidente, esta cabeceira e o seu grupo son un exemplo do selo “Galicia Calidade”, ao representar un compromiso constante coa información local, subliñando que as persoas que nel traballan son un exemplo do “talento e profesionalidade que atesoura esta terra”. Nesta liña, subliñou que os xornais locais son “algo máis que un medio de información”.
