O director de Turismo de Galicia, Xosé Merelles, mantivo esta mañá unha reunión cos responsables da Ruta do Viño Rías Baixas, para analizar, entre outros aspectos, o futuro do enoturismo en Galicia despois dos importantes investimentos realizados polo Goberno galego no marco dos fondos europeos Next Generation. Precisamente, a Xunta está a desenovlver o plan territorial de sostebilidade turística de enogastronomía de Galicia, dotado con 34,5M, no que se inclúen distintas iniciativas de promoción do enoturismo.
Durante a xuntanza, fixeron balance das últimas accións desenvoltas en colaboración neste ámbito entre as que se atopa Primavera de Portas Abertas, cuxa edición de 2026 está próxima a comezar. Xosé Merelles salientou a importancia deste recurso turístico que da valor engadido ao destino Galicia ao tempo que permite desestacionalizar e diversificar a oferta ao longo de todo o territorio. A Ruta do Viño Rías Baixas ten a súa orixe en 1996 sendo un dos primeiros itinerarios enoturísticos de España e tamén unha das primeiras entidades galegas que formaron parte da Asociación Española de Cidades do Viño (Acevin).
