— O director de Turismo de Galicia subliña o aliñamento do novo modelo de certificación e a Estratexia de Turismo de Galicia 2030
— Recoñece o aporte destes distintivos na configuración dun destino coa sostibilidade e a calidade como sinais de identidade
O director de Turismo de Galicia, Xosé Merelles, participou esta tarde na entrega das 33 novas distincións SICTED a entidades do destino Costa da Morte. A xestión destes diplomas e distintivos está organizada pola Costa da Morte Asociación Turística (CMAT), co apoio de Turismo de Galicia.
Na súa intervención, Xosé Merelles puxo en relevo a importancia de Galicia dentro do programa SICTED. A peche de 2025, en Galicia había un total de 18 destinos SICTED con 1.269 entidades distinguidas e 1.522 entidades turísticas participantes, o que marca máximo histórico tanto en participantes como en distincións. “Galicia é -lembrou-a terceira comunidade autónoma española con máis entidades distinguidas, por detrás de Andalucía e Valencia”.
O director de Turismo de Galicia aproveitou para destacar o aliñamento entre o novo modelo SICTED -siglas de Sostibilidade, Intelixencia e Calidade Turística no Ecosistema do Destino- e a Estratexia de Turismo 2030. Este novo modelo, presentado hai dúas semanas, propón tres obxectivos no seu programa: a sostibilidade -que é tamén eixo transversal-; a dixitalización e intelixencia; e a competitividade. Actualmente estase nun período de transición entre modelos, que se alongará ata finais de 2027.
Nesta actualización, os pilares estratéxicos do modelo céntranse na sostibilidade social, económica e ambiental e na calidade nos servizos turísticos que, a través dun proceso inicial de ata dous anos e outro de seguimento de tres máis, recibirán o distintivo de Compromiso de Turismo Responsable.
Merelles aludiu á coincidencia destes valores coa marca país Galicia Calidade, que promove un destino auténtico e singular, coa sostibilidade como eixo transversal. Así queda recollido, lembrou, na Estratexia de Turismo 2030, que propón a configuración de Galicia como destino único e auténtico e, para iso, potencia modalidades específicas da terra, como o enogastroturismo ou o turismo termal.
Ademais, sinalou, a proposta de colaboración público-pública e público-privada que se propón no marco do SICTED alíñase tamén coa Estratexia, que fai da gobernanza do destino e da implicación de administración, empresas, organizacións e sociedade civil na xestión do destino outra das súas claves. “Así, tamén a sostibilidade do destino é para a Xunta de Galicia unha das liñas mestras da súa visión do turismo, como é do novo modelo SICTED”, concluíu.
