- Vaise convocar, vía SMS, a 1.600 forcaricenses de 40 a 75 anos e para esta iniciativa contaráse con dous equipos de enfermaría en cada turno, que efectuarán tarefas de control e cumprimento das medidas de seguridade, realización das mostras e información aos usuarios que o precisen
- A Área Sanitaria de Pontevedra e O Salnés reitera á poboación a importancia de acudir ás citacións para os cribados, á vez que insiste no mantemento das medidas de protección -uso de mascarilla, hixiene de mans e distancia de seguridade-
A Xunta de Galicia, a través da xestión do Servizo Galego de Saúde na Área Sanitaria de Pontevedra e O Salnés, continúa esta vindeira fin de semana no Concello de Forcarei con novos cribados poboacionais con PCR, cara a detectar o maior número posible de portadores asintomáticos, o que permitirá reducir a cifra de contaxios de coronavirus nesta localidade.
Dito cribado voluntario terá lugar no centro de saúde de Forcarei durante o sábado 20 e o domingo 21 de novembro, en horario de 9 a 14 horas e de 16 a 20 horas. Á dita iniciativa preventiva vaise convocar, vía SMS, á poboación forcaricense de 40 a 75 anos de idade, colectivo que neste Concello acada as 1.600 persoas.
Para levar a cabo este cribado, a Administración Sanitaria Pública galega conta con dous equipos de enfermaría en cada turno, que efectuarán tarefas de control e cumprimento das medidas de seguridade, realización das tomas de mostras e información aos usuarios que o precisen.
Este tipo de probas que se efectuarán en Forcarei coninuarán na busca e detección de casos. Os resultados negativos serán comunicados por SMS e os positivos contactando directamente vía telefónica con cada persoa.
Asistencia aos cribados e medidas de protección
A Área Sanitaria de Pontevedra e O Salnés reitera á poboación a importancia de acudir ás citacións para estes cribados, á vez que insiste no mantemento das medidas de protección xa coñecidas -uso de mascarilla, hixiene de mans e distancia de seguridade-.
