-A líder do PP local presenta a súa renuncia como concelleira “forzada pola incompatibilidade legal de ambas responsabilidades” e recoñece que é un día de “sentimentos encontrados”, aínda que advirte que só se trata dun paréntese temporal
-“Débolle todo a Tomiño e aos nosos veciños, polo que agardo que estean orgullosos e garántolles que sempre me sentirei concelleira aínda que non teña acta e que seguirei a atendelos coa mesma disposición e adicación que ata hoxe”, manifestou a edil
-Lara Meneses manterase como presidenta da Xunta Xestora do PP local e a reorganización do partido completarase coa designación de Mónica Otero como voceira e a incorporación de Alba Martínez, número 7 da candidatura, como nova concelleira do grupo municipal
A voceira municipal do PP de Tomiño, Lara Meneses, vén de ser nomeada como nova directora xeral de Xuventude da Xunta de Galicia, segundo anunciou esta mañá o presidente galego, Alfonso Rueda, tras a sesión ordinaria do Consello da Xunta celebrada en San Caetano. A asunción desta nova responsabilidade no executivo autonómico será oficial esta mesma semana coa publicación no DOG.
Por este motivo, a líder do PP local vén de presentar esta mesma mañá a súa renuncia á acta de concelleira e admite que o fai “forzada pola incompatibilidade legal de ambas responsabilidades”.
“Hoxe é un día de sentimentos encontrados porque está claro que é un orgullo que pensen en min para esta responsabilidade e valoren o traballo do PP de Tomiño, pero tamén me afonda a tristura de ter que deixar, por cuestións legais, a niña acta como concelleira”, explicou Meneses.
“Débolle absolutamente todo o que son como política, e tamén moito do que son como persoa, a Tomiño e aos nosos veciños, polo que agardo que estean orgullosos e garántolles que sempre me sentirei concelleira deste pobo aínda que non teña acta na corporación e que quero seguir a atendelos coa mesma disposición e adicación que ata hoxe. Estea onde estea sempre defenderei a Tomiño e aos meus veciños”, significou a futura Directora Xeral de Xuventude.
Lara Meneses, que formalizou a súa renuncia hai uns minutos a través dunha carta presentada no rexistro municipal e que tamén lle comunicou a situación á alcaldesa, Sandra Álvarez, insistíu en que os tomiñeses “son, para min, a medida de todas as cousas e os que me espertaron a plena vocación de servizo público, polo que, cando me necesiten, alí estarei coma sempre”.
A líder do PP local tamén quixo expresar o seu agradecemento a todos os membros da corporación municipal “polo apoio e o respecto” e especialmente aos integrantes do seu partido “pola súa xenerosidade, traballo e implicación e porque xuntos, somos unha garantía plena para que siga adiante, co maior dos acertos, o noso proxecto de alternativa política e democrática no Concello. Tamén lles agradezo o inmenso apoio netes momentos porque sabemos que esta é una boa nova para Tomiño”.
En canto á reorganización do PP tomiñés, Lara Meneses anunciou que vai seguir ao fronte da Xunta Xestora para continuar coa dirección orgánica do partido, mentres que, no grupo municipal, a concelleira Mónica Otero asumirá as funcións de voceira e Alba Martínez, número 7 da candidatura popular, incorporarase como nova concelleira.
