Nas actividades de Nadal de 2021, o Goberno municipal de Cambados gastou, que saibamos de momento, 116.972,24 €. Dado que tende a pagar facturas de actividades de hai máis dun ano, non descartamos que esta cifra medre.
A maior partida foi a Aldea do Nadal; ascendeu a 56.120,40 €. Anque inicialmente se promocionara como unha actividade que apenas supoñía un cargo ás arcas municipais, nesta edición foi encargada a unha empresa, contratada, ademáis, sen concurso público.
Na pista de xeo e actividades de Torrado gastaron 22.145,90 €; descoñecemos canto se recuperou, porque, anque pedimos coñecer a recadación, o Goberno negouse a facer público ese importe. En propaganda e publicidade si
sabemos que gastaron, só nesa campaña, 7.439,44 €.
Do mesmo xeito, este ano o Goberno privatizou a coordinación de actividades de Nadal, por importe de 5.711,20 €. Non acabamos de comprender por que paga a unha empresa externa por exercer unha labor que, ata agora, viñan realizando empregados municipais.
Estes gastos en propaganda e actividades pasivas contrastan coa supresión das ludotecas, de actividades participativas orientadas á infancia en todo o Concello, e a de todas as actividades nas parroquias.
As ludotecas, sobre todo durante as vacacións escolares, son básicas para a socialización e fomento da creatividade dos nenos e nenas, e a conciliación familiar. Certamente son menos vistosas que unha pista de xeo ou unha aldea de case 60.000 €. Pero, a diferenza das anteriores, si ten unha repercusión real no día a día das familias con nenos ao seu cargo. Para moitos pais e nais, son a única forma de compatibilizar os seus empregos ou ocupacións e o coidado dos seus nenos durante os periodos vacacionais.
Desde o BNG defendemos un modelo no que se prioricen as necesidades das familias traballadoras sobre a propaganda, e o importante sobre o chamativo.
